Cabugao, Ilocos Sur – Naaramid manen ti panag-dadayo idi Oktubre 13, 2012 (Sabado) a kaaldawan ti Dayo-Cabugao iti lote ti Munisipio iti Brgy. Baclig (ungto ti Osmena Bridge) Cabugao, Ilocos Sur.
Nasapa a nagsangpet dagiti makidayo ken lugan dagiti koridor a nagiplastar kadagiti idayoda a baka ken nuang. Adu latta met ti dumagas nga umili iti pag-pinapaitan iti sirok ti kayo ta maawis ti atensionda iti panagpupurok ti tao iti dayo a dumna laeng iti Highway iti ungto ti dakkel a rangtay.
Iti pannakiuman ti Web In-Action, imbatad ni Treasurer Rudy Quileza ti asosasion ti Livestock Traders a dakkel a pagrebbengan ti naipaakem kadakuada a mangaywan ti dumakdakkelen a puonan kasta met ti rekord ti Cabugao-Dayo isu nga adda latta a makilanglangen/makian-andingay kadagiti koridor ken duma-Dayo iti kaaldawan ti transaksion. Innayonna nga aywananda daytoy a naitalek kadakuada a pagrebbengan ket impanamnamana ti “sustainable” a pannakaaramid ti transaksion gapu iti kinapudnoda a mangipakat ti kabaelan nga intalek kadakuada iti Gobierno Munisipal nga idauluan ni Mayor Edgardo “Ediboy” S. Cobangbang, Jr. nga agtultuloy a mangtartarabay ken mangtultulong iti Sektor-Livestock ti benneg ti Agrikultura ti ili a Cabugao.
“Adu ti programa a naipatungpalen ken maipatungpal pay iti masanguanan a mangpasayaat pay ti livestock sektor babaen ti panangilungalong ni Mayor Ediboy,” insupusop met ni Municipal Meat Inspector Dante Naval.
Kanaigna, pammasingked ti umadanin a pannakalpas ti pasdek ken pasilidad a masarakan iti dumna ti Cabugao Dayo a mausar iti Municipal Livestock Office a mangtignay ti kaaduan a dumadayo nga agregget pay ken iti agtultuloy a panagbuelo ti progreso iti Cabugao Dayo ita ken iti masanguanan.
Nakipulapol ken nakipatpatang met ni Mayor Ediboy kadagiti indibidual manipud iti nadumaduma a benneg ti kagimongan nga umay agbisbisita iti kaaldawan ti Dayo ken kaduana ni ABC President, Brgy. Captain Teddy U. Soller a katinnulongda a mangiwardas ti panagballigi ti Dayo-Cabugao. # (Web In-Action)
No comments:
Post a Comment