Tuesday, October 16, 2012

GULAYAN TI ARNAP ES, MAIPAGPANNAKEL A PAGTULADAN

Cabugao, Ilocos Sur – Lepleppas ti Re-evaluation ti amin nga eskuelaan ti ili a Cabugao ngem nagkadinamag ti lawa, langto ken mayat a panagbunga dagiti mulada a nateng iti Arnap Elementary School nga idauluan ni Mr. Edison S. Savellano, Head Teacher III.

Iti pannakiuman ti Web In-Action idi Oktubre 15, 2012, imbatad ni Mr. Savellano nga ita la a naipamaysada a husto  ti nagnateng (agduduma) iti arubayan, likudan  ken masungad ti eskuelada. Innayonna a gapu ta paitandudo met ti LGU a maaramid ti “Intensive Gardening” ti tunggal pagadalan, isagsaganada manen ti naibunubon a pangsukatda kadagiti narsaak a naapitanen tapno agtultuloy ti panagpatanorda ti nateng iti pagadalanda.


Dagiti sumaganad a pagimbagan ti panagmulada ti nateng  a sagsagrapenda ita  iti Arnap ES ket dagiti sumaganad:
  • Makapagnateng ken makapagsidada ti kappuros no kayatda iti pagadalan. 
  • Makapaglakoda kadagiti umay agkompra no dida magabenan ti kaadu ti bunga ti natengda. Agpadawatda met no sagpaminsan.
  • Maisungsongda dagiti nasulit nga agmula ti nateng.
  • Sisasagana nga adda isalipda no adda pakontes ti kanatengan.
  • Nupay kabatbatuan ti solar ti eskuela, parabawanda ti nataba a daga ti pagmulaanda.
Mangnamnamada a makapuestoda iti naangay a Re-evaluation  ti DepEd District gapu iti kalawa, baludbod ken kinabunga dagiti mulada a  tarong, okra, karabasa, kabatiti, tabungaw, papaya, paria, hybrid kangkong, pepino, patani, kamote, ken dadduma pay. 

Ti Arnap ES ket maysa kadagiti nasentro a pageskuelaan a pakaaang-angayan pay  ti DepEd District Activities iti Munisipalidad ti Cabugao. # (Web In-Action) 

No comments:

Post a Comment