Saturday, October 13, 2012

SERBISIO ITI BARANGAY, INYASIDEG TI LGU-MSWDO

Cabugao, Ilocos Sur – Naaramid ti pannakaidanon ti serbisio babaen ti Municipal Social Welfare and Development Office ti Munisipio  iti panangidaulo ni Mrs. Lydia S. Gazmen  nangrugi iti  Oktubre 9, 2012 agingga iti Oktubre 12, 2012.

Segun ken ni Mrs. Gazmen, napasamak ti panangdanon  kadagiti recipient-barangays  ta saan-da  a nakapaili dagiti benepisiario a dadduma   a nangala ti Philhealth Cards ken saan-da  a nakaparehistro dagiti baro a recipients ti 4 P’s idiay Cabugao Cultural and Sports Complex maibasar iti listaan ken rekord ti Opisina ti MSWDO.

Immuna a napanan ti grupo iti Barangay Dardarat ken Turod idi Oktubre 9, 2012 sa simmaruno iti Barangay Sisim nga as-asideg a napanan   dagiti recipients a naggapu iti Brgy. Maradodon, Cael-layan, Catucdaan ken Alina-ay.


Iti Oktubre 12, 2012, naggiddan  dagiti recipients ti Brgy. Pila ken Sagayaden ket naangay ti Philhealth Card distribution iti Brgy. Multipurpose Building ti Barangay Sagayaden, Cabugao, Ilocos Sur. Nakikaysa ti Sangguniang Barangay nga idauluan ni Brgy. Captain Virgilio S. Piros.

Impeksa ni Brgy. Captain Piros ti panagyamanna iti LGU nga idauluan ni Mayor Edgardo “Ediboy” S. Cobangbang, Jr. kasta met ti panangimaton ni MSWDO Officer Lydia S. Gazmen ti pannakaiyasideg ti pagsayaatan kadagiti kalugaranna ken kabangibang a barangay.


Sakbay nga awaten dagiti recipients, inlawlawag ni Mrs. Gazmen ti pakabuklan ken pagan-annayasan  ti programa ken ti pateg ti pannakaipatungpalna babaen ti LGU tapno matulongan dagiti marigrigat.

Kadua ni Mrs. Gazmen dagiti  kameng ti opisinana nga isuda: Miss Aida Cueto, Danielle Grace S.  Gazmen, Joy F.  Sayo, Wilma Cruz, Donna Galamgam, ken Jeynelyn Castillo.

 Nagpaay met a Photographers da   Mark Anthony Navarro ken Alvin S.  Solis ti Municipal Website a nangatendar kadagiti nagpa-ID a recipients.

Dimmanggay  ni SB Member Josefina S. Vallejo kadaytoy a panagserbisio ti MSWDO kadagiti barangay. 


Daytoy a gannuat ket paset ti programa a panangtulong ti Gobierno Munisipal Nga idauluan ni Mayor Edgardo “Ediboy”  S. Cobangbang, Jr. kadagiti nababa ti kasasaadna nga umili tapno mapagballigianda iti biag manipud iti kinakurapay. # (Web In-Action)

No comments:

Post a Comment