Cabugao, Ilocos Sur – Naangay ti 2012 Cabugao District Athletic Meet & Coronation Ceremonies iti dua nga aldaw, Oktubre 16-17, 2012 kas tinawen a mapasamak a pakipartisiparan ti amin a pageskuelaan-elementaria/primaria ti ili a Cabugao a pakabuklan ti 4 a Zona a pagsasalipan dagiti ubbing iti nadumaduma nga sport events kas iti athletics, badminton, basketball, softball/baseball, chess, sipa takraw, volleyball, soccer, ken table tennis.
Iti bigat ti Oktubre 16, 2012, naangay ti parade iti Poblasion a nagpartisiparan ti Mr. & Miss Sportsfest 2012, Candidates, Athletes, Coaches, Officiating Officials ken dadduma pay a Guest.
Naisaruno ti programa iti Cabugao South Central School Open Auditorium ket linukatan ni Mrs. Evangeline U. Seatriz, Master Teacher II, CNCS babaen iti ababa a kararag ken naisaganad ti National Anthem a tinokar ti Marching Band.
Words of Welcome ti impaay ni Mrs. Melvi S. Sajonia, School Principal II, CSCS. Imbatadna nga ita ti umuna a pannakaangay ti koronasion ti Mr. & Miss Sportsfest iti Cabugao South CS, bininsana ti pateg ti sports a pakamulian ti napintas nga ugali. Innayon pay ti Principal a pakaragsakanda a ditoy eskuelada ti pakaangayan daytoy dakkel nga event ti Distrito.
Naisaruno ti Entrance & Investiture ti Royal Court. Nangpadaeg iti programa ti pannakaisaad ti korona ni Mr. Sportsfest 2012 Jireh Jipthah-el Mejia ti Cabugao North CS babaen kada Mayor Edgardo “Ediboy” S. Cobangbang, Jr. ken ni Public Schools District Supervisor Helen V. Siruno ken kasta met ti pannakakorona ni Miss Sportfest 2012 Lani Joy Suero ti Cabugao North CS met laeng a nagasmangan da Mayor Ediboy ken ni SB Member Josefina S. Vallejo.
Dagiti Sash, Cape, Scepter,Lei, Bouquet, Trophy ket binagi nga inyawat dagiti nagannak, Officiating Officials, ken dadduma nga Opisiales ti LGU-Cabugao a naitabuno.
Kasta met iti naaramid kadagiti Runner-up ken Candidates ti nadumaduma a galad ken pagsaadan manipud iti nadumaduma a pageskuelaan.
Iti panagsarita ni Mayor Ediboy, kimmablaaw ken binigbigna ti pateg dagitoy nga aktibidad a mangtulong a mangtubay kadagiti ubbing nga agbalin a nadisiplina ken potensial a lideres ti ili iti masakbayan. Pinagyamananna ti partisipasion ti amin a mangbukel daytoy a kadakkelan a paliga ti agbasbasa iti ili kasta met a binigbigna daytoy a dakkel a gapuanan nga agtultuloy a makatulong a mangitag-ay ti ili a Cabugao.
Kalpasan ti Coronation Ceremonies, naaramid ti panglukat a programa ti pay-ayam iti likud ti eskuela a disso ti nalawa a pagsasalipan a dinar-ayan da Mayor Ediboy ken dagiti SB Members.
Nangrugi ti 2-day athletic competition babaen ti pormal a pananglukat ni Public Schools District Supervisor Helen V. Siruno. # Courtesy Photo by Mr. Jayson Sandi (Web In-Action)
No comments:
Post a Comment