Thursday, January 17, 2013

BIN-I TI LASONA, MAIPAAY KADAGITI ONION GROWERS TI CABUGAO

Cabugao, Ilocos Sur – Indauluan ni Mrs. Ester P. Aguimbag, HVCDP Municipal Coordinator a napan nangawat ti bin-i a lasona (Batanes) nga ited ti High Value Commercial Crops Development Program (HVCDP), DA-RFU 1 iti Enero 16, 2013  para kadagiti mannalon nga agmulmula ti lasona iti ili a Cabugao, Ilocos Sur.

 
Segun ken ni Mrs. Aguimbag, umabot ti 12 dagiti Onion Growers manipud kadagiti barangay ti Rizal, Pug-os, Bungro, Sagayaden ken Pila a  recipients kadaytoy a maited a bin-i ti lasona. Panggep  ti programa nga adda bin-i nga usaren  dagiti mannalon ket maisublinto met laeng iti alaenda   tapno maited met iti sabali nga agkalikagum nga agmula.  Manamnama nga umabot ti 1,200 metro-kuadrado ti kalawa iti pakaimulaan dagiti naited nga onion bulb. 

Ti agtultuloy a  pannakaitandudo iti panagmula ti cash crops ket paset ti prayoridad a programa ti Agrikultura iti Gobierno Munisipal nga idauluan ni Mayor Edgardo “Ediboy” S. Cobangbang, Jr. tapno manayonan ti matgedan  dagiti mannalon. # (Web In-Action)

No comments:

Post a Comment