Thursday, January 24, 2013

TURNOVER TI FLATBED DRYER ITI SAGAYADEN FREE FARMERS, NAANGAY

Cabugao, Ilocos Sur -  Naangay ti Thanksgiving ken Turnover Ceremony ti Flatbed Dryer iti Sagayaden Free Farmers Multi-purpose Cooperative iti Barangay Sagayaden, Cabugao, Ilocos Sur idi Enero 23, 2013.

Naangay ti Nasantuan a Misa sakbay ti programa.


Naaramid  ti seremonia ti pannakagetteng ti laso ti pannakaisibro ti pasilidad iti imatang dagiti pannakabagi ti DA-RFU 1 ken OPAG-Ilocos Sur ken  Opisiales ken kameng ti kooperatiba.


Naisaganad ti programa a nangipaayan ni Pastor Edgar Madarriaga iti Naespirituan a panangidaton ken mensahe. 


Nangited met  ti mensahe ni Municipal Agriculturist Zenaida S. Andrada kadagiti agtagikua iti Flatbed Dryer. Impalagipna kadagiti agusar  nga ipateg ken mentenarenda koma daytoy tapno mapaut ti pannakausarna.



Binagi ni Mr. Nereo S. Daproza, AT-DA LGU ti Overview of the Project. Imbagana a parte  pay laeng ti Farm Mechanization Program ti DA iti proyekto. Naited a Grant ti Flatbed Dryer  ngem lote ti bagi ti kooperatiba.


Panangilala ken panangabrasa kadagiti programa para iti pagsayaatan dagiti mannalon  nga ipaay ti Ahensia ti DA ti kangrunaan nga anag ti mensahe dagiti nagsarita nga Opisiales  kas kada Mr. Constante Butacion, pannakabagi ni Provincial Agriculturist Teofilo R. Quintal, Mr. Oscar Tobia, Provincial Corn Coordinator;  Mr. George Acance ken  Mr. Alfonso Mendoza,  iti OPAG-Ilocos Sur.
Dimmar-ay kadaytoy a programa ni Diputado Ryan Luis V. Singson  a binayabay da  Mayor Edgardo S. Cobangbang, Jr., Vice Mayor Danny Q. Gazmen ken Kakapitanes nga indauluan ni ABC President, Brgy. Captain Teddy U. Soller.


Impeksa ni Congressman Ryan ti iliwna kadagiti umili ti Cabugao babaen iti pannakitabunona  iti kakastoy nga awis ta ibilbilangna metten a kakailianna  iti nakaikamanganna a lugar. Imbinsa ni   Diputado Ryan  ti pateg ti RA 7171 nga imputar a linteg  ni Governor Chavit  idi nag-Diputado met isuna. Nupay sapasap a sangaprobinsiaan ti agbenepisiar itoy ket iramanda latta a maikkan ti pundo ken proyekto dagiti mannalon, mangngalap ken  sektor  iti ili a  Cabugao.


Kimmablaaw ken nagyaman met ni Mayor Ediboy iti amin a naitaripnong iti programa. Naragsakan ta immay manen nagbisita  ni Diputado Ryan ditoy Cabugao. Impeksa ti Ama ti Ili nga amin nga asosasion ti mannalon a pakaibilangan ti Sagayaden Free Farmers ket ammoda ti rumbeng a kiddawenda ken agdardarasda a mangipakita ti napintas a nagbanagan dagiti nagun-odda. Iti napintas nga ipakpakita dagiti asosasion ket agbalin nga inspirasionda kasta met iti Konseho Munisipal  nga  agilungalong latta   iti mainayon a pagsayaatan ti sapasap nga umili ti Cabugao.


Pannakikaysa iti pagsayaatan a ginubuay  dagiti nalpas a proyekto  ken  mailungalong manen  a gakat a pagimbagan ti mannalon ken ti sapasap nga umili ti bugas ti mensahe da Vice Mayor Danny Q. Gazmen ken SB Member Benedict M. Savellano, Committee Chair on Agriculture. Inikkan pay  ni SBM Savellano ti kaipananan ti pagsayaatan a maited ti Soil Fertility Mapping Program ti LGU kadagiti mannalon a mailunsad inton Pebrero 4, 2013 iti 33 a barangay ti ili.



Iti Turn-over, nagsarita ni Mrs. Visitacion Mendoza, pannakabagi ni DA Regional Executive Director Valentino  C. Perdido, Ph. D.  Dinayaw ni Mrs. Mendoza ti napintas a kammayet ti LGU ken dagiti asosasion ti Cabugao a manggun-od kadagiti programa ken proyekto  iti DA. Inyallawatna ti pakabuklan ti proyekto kadagiti opisiales ti kooperatiba nga idauluan da Mr. Zosimo Sayaboc, Manager ken Mr. Ferdinand Anor, Chairman, FFMPC  iti imatang ni Mayor Ediboy, Vice Mayor Danny Q. Gazmen, SB Member Carlos V. Sison ken Opisiales ti DA (OPAG ken Region) kasta pay dagiti kameng ken Opisiales ti Kooperatiba.


Naserraan ti programa babaen ti panagyaman ni Manager Zosimo  Sayaboc iti LGU nga idauluan ni Mayor Ediboy ken iti ibibisita ni Diputado Ryan  ken iti naballigi a pannakaisayangkat ti Thanksgiving ken Turn-over ti Flatbed Dryer. Kamaudiananna, napagsasanguan ti naisagana a pangngaldaw nga insagut ti Kooperatiba kadagiti amin a dimmar-ay. # (Web In-Action)


No comments:

Post a Comment