VERMICULTURE, AGTULTULOY NGA IGANNUAT TI DA-LGU

Cabugao, Ilocos Sur – Agtultuloy nga igannuat ti DA-LGU Cabugao iti proyekto a Vermiculture/Vermicompost iti naaramid a Bin iti uneg ti Municipal Plant and Nursery babaen ti panangimaton ni Mr. Obas Bill Y. Baclig, AT.

Iti pannaki-amad ti Web In-Action iti Enero 16, 2013, imbatad  ni Mr. Nathaniel Galamgam,  Caretaker ti Vermiculture Bin, umaboten ti 830 kgs. ti naukkon a  Vermicompost.  Innayon ni Mr. Galamgam a napataud dagitoy manipud iti bulan ti Oktubre 19, 2012 agingga iti Disiembre 17,  2012. Insupusop pay ni Galamgam  a naikkan met kas kiddawda da Mr. Dominador Reynold Sabio ti Barangay Baclig ken Brgy. Captain Valentin S. Tuyor iti Brgy. Bonifacio iti taraknenda nga alinta nga usarenda nga agpataud ti organiko a ganagan.

Daytoy a proyekto ti DA-LGU ket maiyataday iti programa  ti Gobierno Munisipal nga idauluan ni Mayor Edgardo “Ediboy” S. Cobangbang, Jr.  a pannakaisaknap ti Organic Agriculture iti Munisipalidad  tapno makamenos ti gastos  dagiti mannalon iti mausar iti talon ken mangpaadu ti paglakuan dagiti mannalon iti produktoda ken sumayaat a salun-at dagiti umili gapu iti apit ti organiko a panagtalon . # (Web In-Action)