SEAWEEDS PRODUCTION, NAISURO KADAGITI COASTAL RESIDENTS

Cabugao. Ilocos Sur – Naangay ti pannakaisuro ti panagpatanor ti pagkakitaan a  seaweeds kadagiti napili nga agatendar nga agnaed iti pito a Coastal Barangays ti ili a Cabugao, Ilocos Sur  kas iti Brgys. Sabang, Dardarat, Salomague, Salapasap, Namruangan, Daclapan ken Pug-os idi Enero 21, 2013 iti Municipal Conference Hall, Cabugao, Ilocos Sur.

Inlawlawag ni Mrs. Lydia S. Gazmen, Municipal Social Welfare Development Officer iti akem ti panagadal  kas mainayon a tulong kadagiti 4 P’s a pamilia a karaman kadagiti nagseminar.  Innayonna nga agtitinnulong dagiti maseknan nga ahensia a mangipapaay iti 4 P’s Beneficiaries kadagiti  kasapulanda a proyekto-pagkabiagan ken serbisio ti salun-at ken edukasion.

Nangipaay met ti pammaregta a balikas ni SB Member Benedicto M. Savellano, Committee Chair on Agriculture kadagiti nagpartisipar iti agtultuloy a serbisio a para kadagiti mangngalap babaen ti LGU iti panangidaulo ni Mayor Ediboy.

Naglektiur ni Dardarat Brgy. Captain Danny Garcia a tinudingan ti LGU-Cabugao a napan nagadal ti panagpatanor ti seaweeds idiay Cebu iti kallabes. Inasistiran da Mrs. Milagros R. Paz, Municipal Fisheries Coordinator ken Mr. Robert S. Savella, AT, agpada a mangibagi ti DA-LGU ni Kapitan Garcia a nangyadal ti pakabuklan ti teknolohia  kadagiti nagpartisipar.

Nakikaysa met ni Mayor Edgardo “Ediboy” S. Cobangbang, Jr. iti panagtitipon dagiti mangngalap a nagseminar. Kimmablaaw ken nagyaman ti Ama ti ili ta adda kas ken ni Kapitan Garcia a  nakabael  a napan nagsakdo ti adal kadaytoy a teknolohia ket iyallatiwna kadagiti kakaduana a taga-igid ti baybay.

Kinaritna dagiti nagpartisipar a no kabaelan dagiti taga-sabali a lugar nga ipakat daytoy a teknolohia, awan sabali a maisagut no di met laeng isuda no  maipakatda  met  ti inadalda.

Indarirag pay  ti Alkalde Munisipal iti panaggaget dagiti asosasion ti mangngalap a mangirehistro koma    kadagiti gungloda tapno kualipikadoda nga umawat iti maipapaay a livelihood assistance manipud iti Munisipio. Tinudingan ni Mayor Ediboy da Mrs. Paz ken Mr. Savella a mangtulong kadagiti mangngalap  iti proseso dagiti papelesda. Indagadag ti madaydayaw a Mayor nga ikkan koma dagiti mangngalap ti pateg iti panangikalikagum ti Munisipio a maaddaanda ti financial assistance ta awan sabali a makatulong ti panagbiagda no saan nga isuda met laeng a mangngalap.

Nalpas ti panagadal ken napintas dagiti naiplano ken maigannuat a napagtutulagan a maipatungpal iti masanguanan. # (Web In-Action)