Cabugao, Ilocos Sur – Naangay ti maysa nga aldaw a seminar-workshop dagiti Barangay Secretaries iti 33 a barangay ti ili a Cabugao, Ilocos Sur idi Setiembre 12, 2014 iti 2nd Floor Barangay Hall Building, Brgy. Rizal, Cabugao, Ilocos Sur.
Naluktan ti seminar babaen iti panagsarita ni Ms. Constancia Lazo Quinola, LGOO V ken agdama nga MLG Officer ti ili a Cabugao. Nangited met ti pammalagip ni MDRRMC Focal Person, Engr. Nestor B. Somera maipapan iti panagsagsagana ken panangsaranget kadagiti sumangbay a didigra nangruna iti barangay.
Nagintek ti naiyadal kadagitoy nga Appointed Barangay Officials iti pakabuklan ti Katarungang Pambarangay Law ken iti Gender and Development (GAD).
Manamnama nga iti panangileppasda kadaytoy a parte ti Kodigo Lokal ket mapasayaat pay ti serbisioda iti Barangay Court kangrunaan iti umisu a proseso ti pannakaimanehar ti Lupong Tagapamayapa kasta metten dagiti akem ti Gender and Development.
Kangrunaan pay a panggep ti seminar ti pannakaited ti adal dagiti kabarbaro nga agtakem a Barangay Secretaries iti dadduma a barangay tapno adda pamalpalatpatanda kadagitoy a nayon ti pagrebbenganda iti barangayda. # (Web In-Action)
No comments:
Post a Comment