ADDA MET PROGRAMA TI DEPED ITI NUTRISION

Cabugao, Ilocos Sur – Nagmimiting dagiti mangisursuro iti Cabugao South Central School nga idauluan ni Mrs. Melvi S. Sajonia, Principal II idi Setiembre 17, 2014 iti School Canteen ta rugianda nga ipatungpal ti programa ti Departamento ti Edukasion (DepED) maipapan iti panangtulongda kadagiti ubbing nga Undernourished (manipud Kindergarten agingga iti Grade VI) tapno maipasnekda ti agadal no naan-anay ti sustansia a taraonda iti inaldaw.

Segun ken ni Mrs. Annabel Ancheta, School Coordinator ti nasao a programa ditoy a pagadalan ket adda 47 nga ubbing a maikkan ti libre a pangaldaw kadaytoy a panangipatungpalda ti programa ti Feeding.

Kanaig daytoy, pinaregta ni Mrs. Sajonia dagiti amin a nagannak iti pagadalanda ti  panag-gardenda iti pagadalan kasta met kadagiti balbalayda tapno agmulada ti nadumaduma a natnateng a pangnayon pay ti pagtaraon dagiti ubbing ken ti pamiliada.

Kabayatanna, maang-angay ti Regular  Group Works ti Federated Homeroom PTA ti pagadalan ken General Cleaning iti uneg ken ruar ti pagadalan kalpasan ti ilalabas ti Bagyo Luis tapno matulongan dagiti ubbing nga aglinis  kasta met kadagiti mangisursuro a mangmantener iti kinadalus iti pageskuelaan. # (Web Situational Report)