Cabugao, Ilocos Sur – Nakasagana ken agtigtignay a patinayon ti puersa ti Municipal Disaster Risk Reduction Management Council (MDRRMC)-LGU Cabugao, Ilocos Sur nga idauluan ni Engr. Nestor B. Somera apaman nga adda mamonitorda a kalamidad iti Area of Responsibility-da (AOR-da). Iti parais ti nasibet a “Bagyo Luis” iti pagilian ket nangibunga laeng iti napigsa a tudo (Monsoon Rain) ken apagapaman nga angin ditoy Ilokos.
Malaksid iti panagmonitor ti MDRRMC iti National Highway a nagipaknianda ti nasep-ak a sangsanga, napanda pay met kadagiti calamity prone area (inland ken coastal area) tapno obserbaranda ti epekto ti napigsa a tudo ken kasaritada dagiti Opisiales ti Barangay.
Daytoy a panagsagana ket naibasar iti nangato a level ti koordinasion ti MDRRMC kadagiti kabinuligna nga Opisina ken Ahensia ti Gobierno a masakupan pay iti PDRRMC-Ilocos Sur no adda nakaro a tudtudo, layus, uram, aksidente ti lugan ken kanaigna a didigra a mapasamak iti las-ud ti Probinsia.
Iti panagmonitor ti Web In-Action iti Setiembre 19, 2014 ket nabulanos ti panagbaba ti danum kadagiti Creeks iti Poblasion gapu iti pannaka-dredgeda (nakuroban) iti kallabes ket nadardaras ti panagtaray dagiti danum a kumamang iti drainage canal wenno iti waig.
Dagitoy nga aksion ken inisiatiba ket maigapu latta iti napartak a panangipatungpal ti pagrebbengan ti MDRRMC nga agibagnos iti panawen ti napigsa a tudtudo wenno layus tapno maprotektaran dagiti umili iti epekto ti kalamidad. # (Web Situational Report)
No comments:
Post a Comment