Cabugao, Ilocos Sur – Maysa kadagiti agtultuloy nga aktibidad ti BACALL MPA ket iti panagoperar ti Flatbed Dryer-da iti nadaras a panangisagana iti mailako nga irik ta uray matapoganen ti bulan ti Setiembre 2014 ket addan ti maawatda nga umay agipamaga ti irik nangruna kadagiti nakauna a nagmula ti pagay iti kabangibang nga ili iti Umuna a Distrito ti Probinsia. Imbatad ni Mr. Dominador Reynold Sabio, Presidente a daytoy ti pakakitaan nga adu met ti masapa a nakamula ti pagay nangruna kadagiti mairigasionan a disso a kas iti ili ti Sto-Domingo, Ilocos Sur ta bulan ti Setiembre ket agap-apitdan.
Insupusop pay ni Mr. Sabio a malaksid iti napintas a moisture content a patauden ti maipamaga iti Multi-purpose Drying Pavement (MPDP) ket sumursurot met ti pamagaan ti Flatbed Dryer (nangruna no agtudtudo) ket kayatan a nangruna dagiti Palay Traders a gatangen.
Insupusop ti BACALL MPA President a nasayaat met no kastoy ta adda latta pagobraan dagiti miembrosda ken manaynayonan ti matgedan ti asosasionda. Insupusop ni Mr. Sabio nga P.80 ti pagsingirda ti tunggal kilo ti mapamagaanda a pagay. Nadarasda laeng a maammuan ti kasasaad ti pamagaanda ta adda naited kadakuada a Moisture Tester nga inted ti DA-RFO 1.
Dagitoy nga inisiatiba ket maigapu iti agtultuloy a suporta ti LGU-Cabugao ken iti Gobierno Probinsial agraman metten ti OPAG-Ilocos Sur ken iti DA-RFO 1 iti panagmulaan ken pannakapasayaat ti merkado ti irik ditoy ili ti Cabugao, Ilocos Sur iti agdama. # (Web In-Action)
No comments:
Post a Comment