Cabugao, Ilocos Sur – Kalpasan ti Flag Ceremony idi Setiembre 23, 2014, impadamag ken impeksa ni Mayor Edgardo “Ediboy” S. Cobangbang, Jr. ti ragsakna iti napintas a pagkunaan dagiti kakailian a Cabugaoenios maipapan iti pannakaibanag dagiti proyekto nga indonarda ditoy ili ti Cabugao, Ilocos Sur manipud ti rugi ti panagtakemna agingga iti agdama.
Sakbayna, ti Ama ti Ili ket naikkan ti gundaway itay nabiit a bimmisita kadagiti Cabugaoenios iti pagilian ti Amerika.
Kanaig daytoy, pinadayawan ni Mayor Ediboy iti agtultuloy a natunos a panangsangaili ti Pamilia-LGU ken dagiti umili kadagiti Balikbayans iti yuumayda a panagbakasion ditoy ili ti Cabugao ket agtultuloy koma latta iti pannakaiparikna kadakuada ti nabara a pannakasaraboda ken sangsangkamaysa koma ti panagyaman dagiti umili kadagiti proyektoda a mangnayon iti pagimbagan dagiti umili ti Cabugao, Ilocos Sur.
Kabayatanna, pinadayawan pay ti Ama ti ili iti akem dagiti Municipal Officials, MDRRMC, Municipal Police Station ken iti Bureau of Fire Protection (BFP-Cabugao) iti agtultuloy ken napintas a pannakaipaay dagiti serbisio kadagiti umili, pannakamantener ti linak ken talna ken pannakatarabay dagiti umili iti panawen dagiti napalabas a kalamidad. # (Web In-Action)
No comments:
Post a Comment