OPAG, Ilocos Sur – Impalgak ni Provincial Agriculture Officer Teofilo R. Quintal nga impasingked kenkuana ni Gov. Ryan Luis V. Singson a sumublat a tamingenna dagiti mangngalap apaman a sumangpet ti bingay ti probinsia iti excise tax ti tabako kalpasan nga indanonna ti kalikagum dagiti mangngalap no kaano met a tulongan ida ti Gobernador.
Segun ken ni PA Quintal, kalikagum dagiti mangngalap nga adda Ryan Rice, Ryan Corn, ket kaanonto met nga adda Ryan Fish a maibunong kadakuada.
Saan pay a simmangpet ti bingay ti probinsia iti RA 7171 a pakaibilangan ti Ilocos Sur, La Union, Pangasinan ken Ilocos Norte.
Kinuna ni Quintal nga iti daytoy a tawen, idinto a 21 nga ili pay laeng ti napanan ti outreach program ti gobierno probinsial, nakaiwarasen iti 48,168 bags ti complete fertilizer kadagiti mannalon iti probinsia.
Sabali laeng dagiti kuliglig, traktora, hose, sheller ken dadduma pay a ramit-talon.
Nupay kasta, kinuna ni Quintal a binilinen ni Gob. Ryan Singson ti panangukkonda kadagiti resolusion dagiti grupo dagiti mangngalap mainaig kadagiti kasapulanda tapno dagitoy iti maipaayan iti prioridad apaman a sumangpet ti pondo manipud iti RA 7171. # (Adapted, Tawidnews)
No comments:
Post a Comment