Cabugao, Ilocos Sur – Iti pannaki-amad ti Web In-Action iti Setiembre 2, 2014, imbatad ni Mr. Edgar S. Balangatan, AT, Municipal Clean and Green Program Coordinator iti agtultuloy a panang-landscape-da (panangpapintasda) kadagiti pampubliko a disso ken sango ti pasdek ken pasilidad ti LGU-Cabugao ken agtultuloy iti pannakadalusda babaen iti programa ti Clean and Green ti Munisipio.
Maysa kadagiti as-asikasuen ti grupoda iti regular a pannaka-landscape ti sango ti Municipal Garden, dagiti kabarbaro a pasdek iti masakupan ti Municipal Hall, uneg ken iti ruar ti Cabugao Central Park (CCP), sakaanan dagiti monumento dagiti bannuar ken pannakamantener iti sango ti Food Court iti NISTC-Public Market.
Kabayatanna, maar-aramid ti regular a panaglinis iti agsumbangir ti Kalsada Nasional manipud Barangay Sagayaden agingga iti Barangay Pug-os babaen iti kombinasion a panagtinnulong dagiti LGU Personnel ti Clean and Green ken Maintenance Section ti DPWH-Bantay, Ilocos Sur.
Dagitoy nga aksion ken inisiatiba ket maigapu iti napintas a programa ti Clean and Green ken Environmental Management ti LGU-Cabugao tapno mapagtalinaed ti kinadalus ken napintas a mabuybuya iti aglawlaw. # (Web Situational Report)
No comments:
Post a Comment