Cabugao, Ilocos Sur – Maar-aramid ti Bamboo Seedlings Propagation a pakapatanoran ti Bamboo Seedlings kadagiti Barangay ti Lipit, Cuancabal ken Pila babaen iti panangidaulo dagiti Kapitanes ti Barangay nga isuda Brgy. Captain Bernardo Salom ti Lipit; Brgy. Captain Patricio Satumba ti Pila ken ni Brgy. Captain Rolando S. Savellano ti Cuancabal.
Iti naangay a miting ti Bamboo Farmers iti Barangay Pila, Cabugao, Ilocos Sur idi Setiembre 12, 2014, impakaammo ni Dr. Cesar Soller, DVM, Campus Head ti Barang-ay Demo Farm ti Ilocos Sur Community College (ISCS) ken pannakabagi ti Gobierno Probinsial a marugian ti nasaknap a pannakadalus dagiti kakawayanan iti Munisipalidad tapno maasikaso ti panagtan-ay dagitoy a mula a pangrugian iti Bamboo Production ti ili.
Imbatad ni Pila Brgy. Captain Patricio Satumba a nai-plotdan ti 2,500 a Bamboo Seedlings nga innalada babaen kadagiti kakaduana nga isuda Randy Naval, Ronel Rapin, Jogin Silario ken ni Jodel Silario. 700 met a Seedlings ti nai-plot da Kapitan Salom ket dagiti kakaduana ket isuda Emiliano Salom, Roy Aguimatang, Antonio Viloria ken ni Joseph Viloria. 700 met ti nai-plot da Kapitan Savellano ken dagiti kakaduna iti Sitio Cabaruan, Barangay Cuancabal.
Impakaammo met ni MENRO Edgar S. Balangatan ti LGU-Cabugao nga apaman a maparukbos dagitoy a bamboo cuttings ket maipanda iti Municipal Bamboo Nursery iti Barangay Baclig (Municipal Lot) ket ditoy ti pakaasikasuanda a nasayaat sakbay a maitukitda kadagiti mapagkaykaysaan a pakaimulaanda.
Dagitoy nga aksion ken inisiatiba ket maigapu iti agtultuloy a panagkammayet ti Gobierno Probinsial ti Ilocos Sur ken ti LGU-Cabugao a mangitandudo ti produksion a kawayan ti ili a Cabugao ita a Tawen 2014 babaen iti “One Town-One Product” a programa ti Kapitolio Probinsial kadagiti LGUs. # (Web Situational Report)
No comments:
Post a Comment