Tuesday, September 23, 2014

TYPHOON MARIO, NAPARDAS TI AKSION KEN TINNULONG

Cabugao, Ilocos Sur – Ilaylayat pay laeng ni Bagyo Mario ti panagdaliasatna idi malem ti Setiembre 19, 2014, dinoblen ti panagsagana ti puersa ti Municipal Disaster Risk Reduction Management Council (MDRRMC)  nga idauluan da Engr. Nestor B. Somera ken ni Municipal Engineer Crescencio C. Formoso a pakairamanan  ti Skeletal Force ti LGU-Cabugao ket naguurnongda  iti Municipal Hall ti ili a Cabugao tapno makipagtamingda iti pakaseknan ken problema a parnuayen ti nasao a kalamidad.

Nangbukel ti MDRRMC-Cabugao iti  Rescue Team ket nagpatnagda a naguray iti agpa-rescue a maapektaran  kadagiti 33 a barangay kabayatan ti isasaplit ti bagyo.


Iti kaaldawan ti Setiembre 20, 2014, nagindurog ti pigsa ni Bagyo Mario iti dayta a nagmalem ket nagrekurida ti MDRRMC Team/LGU Officials kadagiti barangay partikular kadagiti dati a malaylayus a disso. Napalagipan dagiti umili babaen iti tulong dagiti Barangay Officials  nga agnaed kadagiti asideg ti Karayan, Creek, rangkis agraman iti igid ti kabaybayan nga agalertoda ken ka-koordinarda dagiti Opisiales ken kameng ti maaksionan daras dagiti mapagteng a didigra.

Nakasagana met dagiti Hotline Numbers ti MDRRMC Operation Center iti Munisipio.


Kabayatanna, maaksionan met a  daras dagiti masep-ak a sanga ken mabual a pinuon ti akasia/kayo  iti National Highway babaen iti panagtinnulong ti Bureau of Fire and Protection (BFP-Cabugao) Team kasta metten iti Municipal Police Station Team – Cabugao, sibilian a maapektaran ken Opisiales ti Barangay iti dayta a disso nga agipakni ken mangwada iti dalan tapno naannayas ti panagdaliasat dagiti lugan. Kabayatan ti isasaplit ti bagyo, saan unay nga agbayag iti maparnuay a trapiko iti Kalsada Nasional ta nakasagana met dagiti maikinaria ti LGU-Cabugao nga agipakni kadagiti makasali ti dalan a di kabaelan ti mano-mano kasta met dagiti agsullat a rugit kadagiti   drainage crossing  kas idiay Barangay Cuancabal.

Iti Setiembre 21, 2014 (Domingo), kimmapsut  ti epekto ti Supertyphoon  Mario  ngem napigsa pay laeng ti tudona agingga iti malem. Nagtalinaed dagiti Rescue Team ti MDRRMC-Cabugao iti Munisipio ken kadagiti disso nga agkasapulan ti tulong. Nagtalinaed latta ti puersa ti MDRRMC-Cabugao Team agraman kadagiti support unit kas iti PNP-Cabugao, BFP-Cabugao, Barangay Officials ken sibilian a lumugar kadagiti barangay a maseknan. # (Web In-Action)    


No comments:

Post a Comment