Cabugao, Ilocos Sur – Agtultuloy ti pannakatrabaho ti Track and Field Oval a proyekto ti LGU-Cabugao ken iti LGU-Probinsial a masarakan iti abagatan ti Cabugao South Central School, Bry. Bonifacio. Cabugao, Ilocos Sur.
Segun ken ni Engr. Crescencio Marcos C. Formoso a kalpasan ti back-fill works ti nasao a pasilidad, namulaan ti carabao grass ti pagaayaman ti baseball ken softball babaen iti panagtrabaho dagiti LGU-Personnel.
Maisaruno met a maporma ken mapintaan ti disso ti pakaangayan ti dadduma nga ay-ayam a pakabuklan ti pannakaisagana ti nadakamat a pasilidad para iti District Sports Competition.
Kabayatanna, binisita ni Mayor Edgardo “Ediboy” S. Cobangbang, Jr. ti nadakamat a maar-aramid nga sports facility ket inimatanganna ti naaramid a pannakai-lay out ti disenio iti pagay-ayaman maibasar kadagiti nadumaduma nga sports events a maaramid.
Segun ken ni Mr. Ronel Ubaldo, Physical Education on School Sports (PESS) Coordinator ti Cabugao DepED District nga apaman a maileppas ti disso a pagaayaman kadaytoy a pasilidad ket manamnama a ditoy ti pakaangayan ti kaaduan nga sports events ti District Sports Competition ti Cabugao DepED District a mayeskediul inton Oktubre 13, 2014. # (Web In-Action)
No comments:
Post a Comment