Friday, September 26, 2014

ZONE MEET COMPETITION TI DepED, NARUGIAN

Cabugao, Ilocos Sur – Naangay ti umuna iti dua nga  aldaw (Setiembre 25-26, 2014) a panagsasalip dagiti umaayam a Pupils  iti Elementaria kadagiti agkakadarapat a pageskuelaan ti Cabugao DepED District a kas ituyang ti pannakabingayda iti uppat a sona.

Iti Setiembre 25, 2014, naggiddan a naangay ti nasao nga sports competition iti Zone II ken Zone 1 a naangay kadagiti pagadalan  a mangbukel itoy iti  pageskuelaan iti Barangay Sabang, Cabugao, Ilocos Sur ken iti Barangay Pug-os, Cabugao, Ilocos Sur kas panagsaganadda.


Daytoy a tinawen a pasalip ket maluktan ti Opening Parade a pagpartisiparan dagiti umaayam a tartarabayen dagiti Officials of the Meet kas iti Chairman ken Miembros-da iti nagduduma nga events a mapagsasalipan a kas iti Basketball, Volleyball, Chess, Badminton ken Athletics. Addaanda met iti Clerk of Course a mangtarawidwid iti rekord ti  paay-ayam.

Iti panaglukat ti pay-ayam, naaramid ti ababa a programa. Nasindian ti Torch a mangipalnaad ti rugi ti ay-ayam; maibasa iti Sportsmanship Oath ken agsarita ti Presidente iti dayta a Zona.


Nangipaay ti Mensahe da Mayor Edgardo “Ediboy” S. Cobangbang, Jr. ken ni  SBM Dr. Jemaima S. Tan-Yee, Commitee Chair on Education. Kangrunaan nga anag ti panagmensaheda ket iti panaglalaing koma dagiti ubbing nga atleta iti nakapilianda a pagay-ayaman ken mamantener koma iti sportsmanship a mangmuli iti natibker a kinatao ken disiplinada. 

Binayabay met da Vice Mayor Deogracias Jose Victorino H. Savellano ken kakaduada iti Konseho Munisipal nga isuda SBM Danny Q. Gazmen, SBM Atty. Bryann Jett S. Pano, SBM Josefina S. Vallejo ken ni ABC President, Brgy. Captain Teddy U. Soller iti panagturong ni  Mayor Ediboy kadagiti pakaangayan ti Zone Meet Competition.


Panglukat a sarita ti inakem dagiti Barangay Captain kadagita a lugar iti umuna nga aldaw a da Brgy. Captain Atilano Saquiton ti Barangay Sabang ken ni Brgy. Captain Arnold V. Yangat ti Barangay Pug-os ken nagsarita met dagiti School Heads nga isuda Mr. Edison Solatre ti Sabang Elementary School ken ni Miss Mildred Naval ti Pug-os ES.
Kabayatanna, nayeskediul met ti Setiembre 26, 2014 a panagsasalip dagiti pageskuelaan a mangbukel iti Zone III ken Zone IV a maangay idiay pageskuelaan ti  Barangay Pila, Cabugao, Ilocos Sur ken iti Barangay Sisim, Cabugao, Ilocos Sur kas panagsaganadda.

Kalpasan iti Zone Meet a pakapilian dagiti umaayam, maangayto ti District Meet a pagsasalipan dagiti mapili nga atleta kadagiti uppat a sona iti mayeskediul nga aldaw iti Cabugao DepED District. # (Web In-Action)


No comments:

Post a Comment