Cabugao, Ilocos Sur – Naangay ti maikadua nga aldaw, Setiembre 26, 2014 a panagsalip dagiti umaayam a Pupils iti Elementaria kadagiti agkakadarapat a pageskuelaan ti Zone III a buklen ti Brgy. Nagsincaoan, Lipit, Cuancabal, Pila ken Sagayaden.
Naangay ti panagsasalip idiay pageskuelaan ti Pila Elementary School nga idauluan ni Head Teacher III, Mr. Donato P. Sajor.
Iti Setiembre 26, 2014, naggiddan a naangay ti nasao nga sports competition iti Zone III ken Zone IV a naangay kadagiti pageskuelaan iti Barangay Pila, Cabugao, Ilocos Sur ken iti Barangay Sisim, Cabugao, Ilocos Sur kas panagsaganadda.
Naluktan ti pay-ayam babaen iti Opening Parade a nagpartisiparan dagiti umaayam a tartarabayen dagiti Officials of the Meet kas iti Chairman ken Miembros-da iti nagduduma nga events a mapagsasalipan a kas iti Basketball, Volleyball, Chess, Badminton ken Athletics. Addaanda met iti Clerk of Course a mangtarawidwid iti rekord ti paay-ayam.
Iti panaglukat ti pay-ayam, naaramid ti ababa a programa. Nasindian ti Symbolic Athletic Torch babaen kadagiti Presidente ti Zona; naibasa iti Sportsmanship Oath ken nagsarita dagiti Presidente kadagita a Zona ken improklama ni Mr. Ronel M. Ubaldo, District PESS Coordinator ti Pormal a panaglukat ti ay-ayam.
Nangipaay manen ti Mensahe da Mayor Edgardo “Ediboy” S. Cobangbang, Jr. ken ni SBM Dr. Jemaima S. Tan-Yee, Commitee Chair on Education. Kangrunaan nga anag ti panagmensaheda ket iti panaglalaing koma dagiti ubbing nga atleta iti nakapilianda a pagay-ayaman ken mamantener koma iti sportsmanship a mangmuli iti natibker a kinatao ken disiplinada.
Innayon ni Mayor Ediboy iti panagyamanna kadagiti amin nga ubbing, mangisursuro, nagannak, Guardians, Opisiales ti Barangay a nakikammayet iti aktibidad ta napintas ti koordinasion ken panagtutunosda a mangipromot kadaytoy a tinawen a pasalip a paka-hulmaan dagiti ubbing nga agbalin a naresponsable nga umili.
Binayabay met da Vice Mayor Deogracias Jose Victorino H. Savellano ken kakaduada iti Konseho Munisipal nga isuda SBM Danny Q. Gazmen, SBM Atty. Bryann Jett S. Pano, SBM Josefina S. Vallejo iti panagturong ni Mayor Ediboy kadagiti pakaangayan ti Zone Meet Competition.
Nagsarita met da Barangay Captain Patricio Satumba ti Barangay Pila ken ni Brgy. Captain Ruben Siruno ti Barangay Sisim ken kasta metten a nagsarita dagiti School Heads kadagiti nadakamat a pagadalan.
Kabayatanna, mayeskediul manen ti pannakaangay ti District Meet a pagsasalipan dagiti mapili nga atleta kadagiti uppat a sona iti Cabugao DepED District iti sumaruno a bulan. # (Web In-Action)
No comments:
Post a Comment