Cabugao, Ilocos Sur – Nagtignay ti nabukel a Relief Operations Team ti Municipal Social Welfare and Development (MSWD) nga idauluan ni Mrs. Lydia S. Gazmen ket nagitedda ti Relief Goods (Bagas, Sardinas ken Payless) kadagiti naapektaran nga indibidual ken Pamilia maigapu iti idadaliasat ti Bagyo Mario idi Setiembre 19-21, 2014.
Immuna a nagturongan ti grupo iti Barangay Quezon, Cabugao, Ilocos Sur nga immuna a nakaisubmiter ti listaan dagiti naapektaran a pamilia (nalayus iti igid ti karayan ken Creek ken nadadaelan ti balayna) sa simmaruno iti Barangay Pug-os sa iti Barangay Aragan.
Kabayatanna, nagtignay dagiti Opisiales ti Barangay nga idauluan ti Punong Barangay kadagiti 33 a barangay ti ili ti Cabugao tapno bisitaenda dagiti naireport a naapektaran a pamilia/indibidual iti lugarda iti bagyo kasta met a tumulongda a mangtingiting iti crop damage iti benneg ti agrikultura kadagiti nagpasiar a Teknisian ti DA-lgu Cabugao a pakairamanan ti impraestruktura ken kanaigna a pasilidad ti barangay a nadadael iti idadaliasat ti Bagyo Mario.
Kanaig daytoy, agtultuloy latta ti Relief Operation and Distribution Team ti Munisipio kadagiti dadduma pay a barangay ti ili a nagireport iti naapektaran agingga a sapasap a maikkan ti tulong dagiti maseknan a pamilia ken indibidual. # (Web In-Action)
No comments:
Post a Comment