Cabugao, Ilocos Sur – Naselebraran ti maika- 121 a panagkasangay (Setiembre 16, 1893) ni General Eustaquio S. Baclig, Maingel a Soldado ti Gubat ken Beterano iti World War II, a daytoy ti nakaigapuan ti nakaipanaganan ti Barangay Baclig, maysa kadagiti uppat a Barangay ti Cabugao Poblasion, babaen iti Akta Republika 3590 a pinirmaan daydi Dios-ti-Aluadna a Presidente Carlos P. Garcia ti Pilipinas.
Babaen iti panagsukisok iti biagna, ni General Baclig ket nagadal iti US Military Academy , West Point ken nagturpos ti Engineering Degree idi 1917. Inted ni Presidente Manuel L. Quezon ti Purple Cross, kangatuan a Pammadayaw iti Soldado ken Posthomous Promotion to Full Star General gapu iti Tured ken Kinabannuarna.
Iti Setiembre 16, 2014, indauluan ni Brgy. Captain Carlos Vallejo Sison dagiti lumugar ken Opisiales ti Barangay a binayabay da SBM Danilo Q. Gazmen; SBM Josefina S. Vallejo ken ni SBM Atty. Bryann Jett S. Pano iti pannakaidaton ti sabsabong a pammadayaw iti Monumento ti Bannuar nga Ilokano iti dayaen ti Pasdek ti Munisipio ti ili a Cabugao.
Nakulminar ti selebrasion babaen iti nagduduma a naaramid nga aktibidades iti Barangay Baclig nga indauluan dagiti Opisiales ti Barangay ken dadduma pay nga Asosasion/Sektor a masakupan iti nasao a barangay.
Ti Barangay Baclig ket daytoy ti kadakkelan ti Land Area iti Poblacion (227.5 Hectares). Panagtalon ti kangrunaan a pagbiagan dagiti agindeg ditoy a Barangay. Addaan ti dua a Sitios: Lusong Suyo ken ti Callaguip. # (Web In-Action)
No comments:
Post a Comment