3rd DAY TI PROVINCIAL MEET 2014, RISIRIS DAGITI GAMES

Cabugao, Ilocos Sur – Iti maikatlo nga aldaw (Disiembre 4, 2014) a pannakaaramid dagiti Games iti  2014 Ilocos Sur Division Sports Competition ket naregget ti risiris dagiti Team a nakaeskediul iti  salip ti lima a Unit (Unit 1 to  Unit V)  a mangbukel iti 32 a Munisipalidad ti Ilocos Sur. 

Nausar dagiti pasilidad ti Sports iti Cabugao District Athletic Oval (Freedom Park), Social Hall ti Cabugao South Central School,  Covered Court ti Barangay Bonifacio, Cabugao Central Park (CCP) ken iti Cabugao Cultural and Sports Complex ti Barangay Rizal iti pannakaaramid dagiti ay-ayam.

Agtultuloy met ti ipapan pannakitinnarabay dagiti Opisiales Lokal nga idauluan ni Mayor Edgardo “Ediboy” S.  Cobangbang, Jr. iti Cabugao Athletic Oval ken panagmonitor ni SBM Atty. Bryann Jett S. Pano, Committee Chair on Sports kadagiti pagay-ayaman.

Kabayatanna, aktibo latta met a nakigamulo iti paay-ayam dagiti Opisiales/Kameng a mangbukel iti Cabugao Steering Committee a buklen dagiti nadutokan nga Empleado ti LGU-Cabugao a nakinaming/tumulong  iti panagannayas iti   unos ti lima nga aldaw (Disiembre 1-5, 2014) ken iti Game Proper a maar-aramid  iti Provincial Meet 2014  ditoy Cabugao.

Naregget met dagiti Pannakabagi ti Linteg (PNP-Cabugao ken ti BFP-Cabugao), BPATS/Barangay Tanod/Public Safety (Blue Boys)  nga  agrekrekurida iti uneg ken agiwardas ti Trapiko iti National Highway kasta pay kadagiti  First Aide a buklen dagiti Nurses (RN-Heals), MDRRMC (Wasar) ken dagiti Ambulansia ti Munisipio a nakadeploy iti game area (Freedom Park). 

Naregta latta met dagiti Clerk of Course/Recorder kasta pay dagiti Announcer/Presentor iti School Stage a mangipakpakaammo iti  pagdurdur-asan ti paay-ayam, panangiyanunsio ti panagsagana dagiti sumaruno nga agsalip a Unit  ken  dagiti nangatiw a Unit Team kalpasanna, panawagan iti pakaseknan ti ay-ayam,  dagiti Atleta ken  agraman pay dagiti agbuybuya.

Iti pannakiuman ti Web In-Action, imbatad ni Mrs. Jennifer Biteng, Maestra ken Opisial ti Unit 4 a saan laeng nga iti pannakaaddan ti napintas a pagay-ayaman ti pangapresiaranna ditoy Cabugao no di pay iti nakaad-adu a nagbaliwan ken progreso ti ili.

“Very hospitable, napigsa nga LGU support ti mamagballigi iti amin nga aspeto ti Provincial Meet 2014!” impeksa met ni Mr. Manolito Dangtayan, Coach ti Unit V (Private Secondary Level).

Napagay-ayaman amin dagiti events iti dayta a petsa ket nasapsapa a naileppas iti Athletics nga adda iti kategoria ti Throwing and Running Events.

Madesisionan pay laeng ti dadduma nga events iti maudi nga aldaw (Disiembre 5, 2014)  kas iti  Basketball (Boys & Girls), Baseball, Softball,  Lawn Tennis,  Badminton, Soccer, Volleyball (Boys & Girls), ken Sepak Takraw. # (Web In-Action)