Cabugao, Ilocos Sur – Inimatangan ti Pamilia-LGU Cabugao, Opisiales ti 33 a Barangay ti ili, Bisita ken agraman dagiti umili ti Cabugao, Ilocos Sur iti Ceremonial Lighting iti 33 nga agkakadaeg a Christmas Tree a naaramid iti kawayan. Napagaabay dagiti nadakamat a Christmas Tree iti akindaya a parte ti Cabugao Central Park (CCP), Brgy. Bonifacio, Cabugao, Ilocos Sur idi sumipnget ti Disiembre 1, 2014.
Mismo a ni Mayor Edgardo “Ediboy” S. Cobangbang, Jr. ti nangi-switch on iti panaggigiddan a panagsilaw dagiti Christmas Tree a nakaragsakan unay dagiti nakaimatang.
Sakbayna, imbinsa ni Mayor Ediboy iti pannakipaset ti Gobierno Probinsial babaen kada Governor Ryan Luis V. Singson ken ni Vice Gov. DV Savellano a nangilungalong iti pannakaaramid ti kakastoy a pasamak a mangparagsak iti Selebrasion ti Paskua.
Innayon ti Ama ti Ili a nupay tradisional daytoy a kannawidan iti sapasap ket kalikaguman ti LGU-Cabugao ken ti Kapitolio Probinsial a mataginayon daytoy a maar-aramid tapno agtalinaed iti napintas a panagkaykaysa dagiti umili nangruna iti barangay.
Insupusop pay ni Mayor Ediboy nga ipakita ti nagapuanan iti Christmas Tree iti napintas a panagkakammayet ken kooperasion dagiti nagaramid kadayta a proyektoda ket naragsakan unay ti Alkalde Munisipal a nangipeksa a balligi ti amin iti kaipapanan ti pannakapaadda dagitoy a mabuybuya iti CCP iti agdama.
Kalpasan ti Ceremonial Lighting ket simrek dagiti umili iti ayan dagiti Christmas Tree ket naaramid ti panagbuyada iti tunggal patakder a kabuyog metten ti picture-taking dagiti nagbuya. # (Web In-Action)
No comments:
Post a Comment