Cabugao, Ilocos Sur – Naangay ti Christmas Program 2014 ti Cabugao Federated Senior Citizens nga idauluan ni Mr. Bonifacio Somera, Presidente, idi Disiembre 16, 201 iti Cabugao Cultural and Sports Complex, Brgy. Rizal, Cabugao, Ilocos Sur.
Sakbayna, nasapa a napan nakimisa iti Cabugao Catholic Church dagiti kameng sada nagtarus iti nakaangayan ti programa ken selebrasion.
Napnuan regta ken ragsak dagiti nataengan (lallakay ken babbaket) ket nasapada a nagtataripnong iti dayta a bigat. Impamatmat dagiti nagpartisipar a nataengan a nangirepresentaranda ti barangayda ti kabaelanda nga agkanta.
Nakikaysa dagiti Municipal Officials nga idauluan ni Mayor Edgardo “Ediboy” S. Cobangbang, Jr. ken ni Mrs. Lydia S. Gazmen, Municipal Social Welfare Development Officer ti Cabugao.
Nag-Opening Remarks ni Mr. Bonifacio Somera, Presidente. Inawisna ti amin a makipaset kadaytoy a panagselebrarda kas panangipakita ti panangpadayaw iti pannakaipasngay ti Mannubbot a mangisalakan ti sakangtaw-an.
Kalpasan ti Intermission Number, nangipaay ti Mensahe ni MSWD Officer Mrs. Lydia S. Gazmen ket bininsana ti pateg ti panangipaay ti ayat, panagisagut ken pannakitimpuyog iti inaldaw kangrunaan iti panawen ti Paskua. Dinayawna pay ti tanipkel dagiti nataengan a makidanggay iti amin nga aktibidades nga igannuat ti Munisipio.
Nangipaay ti Mensahe ni Mayor Edgardo “Ediboy” S. Cobangbang, Jr. Kimmablaaw ken nagyaman iti maipakpakita a pannakikammayet dagiti nataengan ken iti agtultuloy a pammatida iti Gobierno Munisipal.
Dinayaw ni Mayor Ediboy iti nagteng dagiti nataengan nga edad ken pribilehio a maipapaay kadakuada kas pagwadan kadagiti sumarsaruno a henerasion. Innayon ti Ama ti ili a masindadaan ti Gobierno Munisipal agraman ti Sangguniang Bayan a mangkomplementar iti kiddawenda kas pagsupapakda met iti napintas a kooperasion dagiti nataengan.
Dinakamat pay ni Mayor Ediboy a saan a paudi ti Senior Citizen ti ili a Cabugao iti magapuanan kadagiti programa nga ipaay ti benneg ti rehion ket maited met dagiti namnamaen ti Gobierno Lokal a pakabang-aranda agsipud ta adu pay ti pagsayaatan a maaramidanda ditoy nga ili.
Kangrunaan pay nga anag ti Mensahe ni Mayor Ediboy iti panangipaay ti “Ayat” iti pada a tao. Imbatad ti Ama ti Ili iti naipangruna a panangiparikna ti Gobierno Munisipal ti suporta ken pammategna kadagiti nataengan kadagiti aktibidades ken programa a naisayangkatdan. Innayon ti Alkalde Munisipal a maaramid dagitoy a tagipatgen a galad tapno masupapakanto met iti napintas a pagbanagan dagiti agdama a henerasion iti panagbalinda a nataengan.
“Bigbigenmi a pagulidanan dagiti impakitayo ken insuroyo a napipintas a bambanag kadakami nga ub-ubbing,” impeksa ni Mayor Ediboy iti panagsaritana. “Ket gapu ta naited kanyami ti talek nga agserbi para iti pagsayaatan ti kaaduan, kayatmi met a subadan dagita nga an-anusyo babaen iti rukod ti kabaelan ti Gobierno Munisipal a pangtulong kadagiti nataengan.”
Indauluan ni Mayor Ediboy ken binayabay dagiti Municipal Officials iti pannakaiyawat ti P20,000 Cash a sagutda kadagiti Senior Citizen ti Cabugao. Inawat ni Mr. Bonifacio Somera ti nasao a gatad ket sangsangkamaysa a nagyaman dagiti amin a naitallaong a nataengan kadagiti Opisiales ti Ili.
Kas mainayon a sagut dagiti nataengan ita a Paskua, ikkan ti Opisina ni Mayor Ediboy ti Premio dagiti kaaduanen ti Tawen a Senior Citizen, agparis a Lalaki ken Babai, ket alaenda ti premioda idiay Opisina ni Mayor Ediboy.
Nangipaay met ti Mensahe da SBM Atty. Bryann Jett S. Pano, Committee Chair on Social Services kasta met ken ni Retired Judge Efren S. Ubungen ket linagipna dagiti namaris a panawen ti pannakigamulona iti pagsayaatan ti kapatadanna ken ti ilina agingga iti agdama. Innayon ti Hues a napateg a lagipen ti pannakayanak ti Mesias a sarikedked ti Sangkataw-an.
Panagayat, panagkaykaysa ken panagsisinnagut ti kangrunaan a Tema ti Mensahe ni SBM Vicky S. Serna kadagiti naitallaong iti daytoy a selebrasion.
Nakikaysa met da SBM Danny Q. Gazmen; SBM Dr. Jemaima S. Tan-Yee; SBM Benedicto M. Savellano; SBM Josefina S. Vallejo; SBM Jayhan Alcid-Tan; MSWD Assistant Leonora G. Reintar, OSCA Head Mr. Remigio B. Sunico ken dadduma pay a pannakabagi ti Munisipio.
Naisaganad ti pannakaaramid iti Raffle Draw a nagbunotan dagiti Konsehales ti Ili a nakagun-odan dagiti napagasatan a nataengan iti agkakapateg a sagut. Naaramid pay ti Exchange Gift kadagiti nangted ti sagutda. Naileppas ti programa a naballigi ken siraragsak dagiti nataengan a nagawid iti pagtaenganda. # (Web In-Action)
No comments:
Post a Comment