Cabugao, Ilocos Sur – Iti Meeting ti DA-LGU-Cabugao Staff iti 2014 iti kada bigat ti Lunes, napagnanamingan dagiti DA Personnel a mapagtalinaed ken maitultuloy a maipatungpal ti serbisioda kadagiti barangay a destino ti tunggal Personnel/Technologist iti nasao a Departamento ti LGU-Cabugao.
Iti biang met dagiti asosasion dagiti mannalon ken mangngalap, maibatay iti pannakiam-amad ti Web In-Action kadakuada, napintas unay kadakuada daytoy a parupa ti serbisio nga itultuloy ti nasao nga opisina tapno maipamaysada a maammuan dagiti pakaseknanda a mannalon a saanda a maitugot iti papanda iti opisina ti DA-LGU gapu ta kasapulan met a maaktualan koma dagiti Teknisian ti kasasaad dayta a pakaseknan iti barangayda nangruna iti nadumaduma nga “crop stages” partikular iti naimula a pagay, tabako, nateng ken mais.
Imbatad ti dadduma a Presidente ti asosasion a ditoy ita a mariknada ti kinaepektibo ti maysa a Teknisian a mangipatungpal ti programa iti Agrikultura agsipud ta kadakuada ket ti maysa nga “Extensionist” ket kasapulan nga agtultuloy a makilangen kadagiti mannalon a makasapul iti pannarabayda.
Innayon pay dagiti mannalon ken mangngalap nga epektibo dagiti mairubuat a programa ken proyekto ti DA-LGU a mangitag-ay ti kasasaad dagiti klienteda a mannalon ken mangngalap tapno agtultuloy a mayagpang ti serbisio a tun-oyen ti Gobierno Munisipal nga idauluan ni Mayor Edgardo “Ediboy” S. Cobangbang, Jr. para kadagiti umili.
Daytoy nga inisiatiba dagiti DA-LGU Personnel ket maysa a wagas iti panangidanonda iti napateg a serbisio para iti sektor dagiti mannalon ken mangngalap.
Ti DA-LGU Cabugao ket idadauluan ni Municipal Agriculturist Zenaida S. Andrada. # (Web Situational Report)
No comments:
Post a Comment