Cabugao, Ilocos Sur – Naisayangkat ti “FLU VACCINATION” itay nabiit iti Rural Health Unit-LGU Cabugao a nagpabakunaan dagiti nataengan (indigent) kabayatan iti Christmas Program 2014 Celebration dagiti kameng ti Cabugao Federated Senior Citizens iti Disiembre 2014.
Maibatay iti rekord ti Rural Health Unit (RHU)-Cabugao, naipatungpal metten ti “Mass Immunization” kadagiti ubbing nga agtawen manipud 1 agingga iti 5 maikontra iti Kamuras. Malaksid itoy, naaramid pay ti bakuna iti anti-Diptheria, Polio, & Tetanu kadagiti ubbing ken dadduma pay a kita ti bakuna a paset ti serbisio ti DOH kadagiti ubbing.
Segun iti mapagdamagan iti Municipal Health Office ti ili, impakaammoda a naipatungpal dagitoy a nasaknap a panagbakuna a tinarabay ti DOH tapno mapasakbayan iti ikakapet dagitoy a sakit kadagiti amin a lokalidad agraman iti ili ti Cabugao, Ilocos Sur.
Innayonda a daytoy a naballigi a krusada kontra dagitoy a sakit ket gubuay met laeng iti natanipkel a panagkaykaysa dagiti parupa iti Serbisio ti Salun-at a nangruna kadagiti adda iti barangay babaen iti agtultuloy a suporta ti Gobierno Munisipal nga idauluan ni Mayor Edgardo “Ediboy” S. Cobangbang, Jr.
Kabayatanna, pinagbalinda iti RHU nga “Everyday Immunization” ti Anti-Tetanu Vaccination iti tunggal mapan a masikog/inna.
Dagitoy nga aksion ken inisiatiba ket resulta ti napintas a koordinasion ti LGU, Barangay ken iti DOH iti pannakasigud a pannakatiped dagiti agsaknap a nakaro a sakit a kas iti Kamuras, Flu ken kaarngina a makadangran a sakit. # (Web In-Action)
No comments:
Post a Comment