Cabugao, Ilocos Sur – Inawat ti 495 nga umili (4Ps Recipients) iti bayad ti panagtrabahoda (10 nga aldaw ti nabatayan ti tunggal maysa) iti Cash for Work Program ti Department of Social Welfare and Development (DSWD) a tinarabay ti LGU-Cabugao kadagiti 33 a barangay ti ili idi Hulio 27, 2016 iti Cabugao Cultural and Sports Complex, Brgy. Rizal, Cabugao, Ilocos Sur.
Nasangaili ti pannakabagi ti DSWD Regional Office 1 a tinulongan dagiti Staff ti MSWDO nga idauluan ni MSWD Officer Lydia S. Gazmen iti pannakaproseso dagiti papeles dagiti nag-claim nga umili sakbay nga inawatda ti mabatayanda a bayad a nakakuentaan ti aldaw a panagobrada iti barangay-da.
Sakbay a nairugi ti Pay-out ket kimmablaaw ken nagyaman ni Mrs. Gazmen. Inlawlawagna ti pakabuklan ti programa ti Cash for Work ti DSWD ket pagyamananna iti agtultuloy a suporta ti LGU-Cabugao nga idauluan ni Mayor Josh Edward S. Cobangbang kasta metten kadagiti Opisiales ti DSWD ta simmangpet manen daytoy nga inur-uray dagiti agobra iti Cash for Work Program.
Naipagteng ti Mensahe ni Mayor Josh Edward S. Cobangbang. Kimmablaaw ken nagyaman iti daytoy a pagsayaatan nga impagteng manen ti nasional a gobierno a mangpalag-an ti kasasaad ken rikna dagiti umili. Dinayaw ti Alkalde Munisipal dagiti kailianna ta ammoda nga itrabaho dagiti naipakumit kadakuada a pagrebbengan iti pannakasagrapda kadaytoy a pagimbagan.
Dinakamat ni Mayor Josh Edward ti pateg ti pakabuklan iti P940,500 a gatad a masagrap ita nga aldaw dagiti kailianna nga immawat iti Cash for Work Program.
Iti pannakiuman ti Web In-Action kadagiti umawat ti bayad ti panagtrabahoda (P190 ti tangdan iti kada aldaw) ket impeksada ti nalaus a panagyamanda iti Gobierno Munisipal nga idauluan ni Mayor Josh Edward kasta metten iti DSWD ta no kaskasano ket makatulong kadakuada daytoy nga inawatda ken nangruna a para gastos iti pamiliada. # (Web In-Action)
No comments:
Post a Comment