ORGANIKO GANAGAN, AGTULTULOY A MAADAPTAR

Cabugao, Ilocos Sur – Iti pannaki-amad ti Web In-Action idi Hulio 8, 2016, imbatad ni Mr. Nathaniel Galamgam,   Municipal Organic Production Focal Person, iti paanakaadaptar/pannakapaadu ti “African Night Crawler” nga alinta a pupokda kadagiti Vermicompost  Bin iti Brgy.  Baclig ken Barangay Turod Patac, Cabugao, Ilocos Sur a disso dagiti nakaitedan ti pamuonan nga alinta. 

Innayon ni Mr. Galamgam a kasapulan koma a regular ti panag-harvest-da  iti naurnong a rugit dagiti alinta tapno masuplayan dagiti aggatang  a mannalon/indibidual  iti produksionda (takki ti alinta)  tapno maparegtada a mangtulad ken  tapno adda usarenda a pagabuno  iti pagtatalonan ken pagnatenganda.

Ti Vermiculture/Vermicomposting Project ti DA-LGU ket panggepna a patuladan/tignayen  ken ipakita iti epekto ti organiko a ganagan  iti mula a pagay ken nateng ken kas pangannurot iti sinaguday  ti  Akta Republika 10068 (Organic Agriculture Act 2010) a linteg a mangipatungpal iti Organic Agriculture  ket agbalin a kapartner ti DA iti LGU iti implementasion ti nadakamat a linteg. 

Iti agdama,   ti nadakamat a Vermicompost  Production  ti DA-LGU ket agpapaay a modelo ket imatmatonan met ni Mr. Obas Bill Y. Baclig, Municipal Organic Production Coordinator ti Vermicompost/Vermiculture  Bin iti Municipal Plant and Nursery.

Kabayatanna, sagsagrapenen dagiti mannalon ti ili a Cabugao iti naikumit ti LGA Technology, Inc., kapartner ti LGU-Cabugao iti Solid Waste Management Program ti napagbalin nga organiko nga abuno iti pannakausar ti agrupsa a basura babaen iti proseso nga inaramid ti nasao a kompania. Naiyuna a naikkan dagiti 35 nga Asosasion ti mannalon ti ili a Cabugao iti sag-40 a bags ti organic fertilizer babaen ti panangiyallawat ni Mayor Josh Edward S. Cobangbang kadagiti dadaulo ti mannalon kalpasan iti miting dagitoy.


Paset daytoy iti panangkomplementar    iti programa ti Gobierno Munisipal nga idauluan ni Mayor Josh Edward  S. Cobangbang  ti  pannakaitandudo ti Organic  Agriculture iti Sektor dagiti mannalon    iti Cabugao, Ilocos Sur iti agdama. # (Web In-Action)