Cabugao, Ilocos Sur – Iti pannakium-uman ti Web In-Action, imbatad ni Mr. Edgar S. Balangatan, AT, Municipal Clean and Green Program Coordinator iti agtultuloy a panaglinisda kadagiti pampubliko a pasilidad ti LGU-Cabugao kas iti Parke, Plaza, sango ken arubayan dagiti Government Facilities babaen iti programa ti Clean and Green ti Munisipio.
Iti Poblasion ken Coastal barangay ket regular met a maiwayat iti panagdalus nga idauluan dagiti Opisiales ti Barangay iti parte a masakupanda babaen iti itutulong dagiti sektor ken asosasion iti barangayda.
Kabayatanna, maar-aramid latta ti regular a panaglinis iti agsumbangir ti Kalsada Nasional manipud Barangay Sagayaden agingga iti Barangay Pug-os babaen iti panagtinnulong dagiti LGU Personnel ti Clean and Green kasta metten dagiti pannakabagi ti Maintenance Section ti DPWH-Bantay, Ilocos Sur ken ti Kyeryong – J.D. Policarpio (JV).
Nupay kasta, insupusop ni Mr. Balangatan a saan latta met nga agsina a pakaseknan ti Munisipio iti maipapan iti Solid Waste Management ken iti Clean and Green iti intero a Munisipalidad.
Kasta met nga agtultuloy a maipromot koma iti panagdaldalus iti kalsada kadagiti barangay babaen iti itutulong dagiti Opisiales ti Barangay a kabinnulig ti Munisipio a mangitandudo kadagitoy nga agdama a programa, segun pay ken ni Mr. Balangatan.
Dagitoy nga aksion ken inisiatiba ket resulta iti napintas a koordinasion dagiti Opisina ken Ahensia a maseknan ken dagiti adda iti salinong ti LGU-Cabugao nga idauluan ni Mayor Josh Edward S. Cobangbang para iti pannakaitandudo dagiti aktibidad nga agtultuloy a mangpasayaat iti aglawlaw ti Munisipalidad. # (Web Situational Report)
No comments:
Post a Comment