PANAGSAPATA 2016, NAARAMID DITOY CABUGAO

Cabugao, Ilocos Sur – Naangay ti panagsapata dagiti Opisiales-Lokal ti ili a Cabugao, Ilocos Sur idi Hunio 30, 2016 iti uneg ti Simbaan ti Iglesia Romano  Katolika kalpasan iti naidaton a Nasantuan a Misa nga inannong ni Arsobispo Marlo Peralta, D.D. ken binayabay da Rev. Leo Inofinada; Msgr. Gary Formoso ken ni Ret. Archbishop Ernesto Salgado, D.D.

Nagsapata  ni   Mayor  Josh  Edward  Seguban   Cobangbang  a kinadua ti inana, Mrs. Jerlie Seguban-Cobangbang  ken dagiti  tallo a kakabsatna a lallaki. 

Pinagsapata  ni Mayor Edgardo “Ediboy” S. Cobangbang, Jr. ti  baro a Mayor iti sango  ti altar nga inimatangan dagiti umili, natatakneng a personalidad, Opisiales ti Barangay ken pannakabagi iti nadumaduma nga Ahensia, Opisina ken Sektor iti kagimongan.

Iti mensahe ni Mayor Josh, kimmablaaw ken nagyaman iti aglaplapusanan a suporta ken ayat  dagiti umili kenkuana ket saanna ida a paayen a mangited iti hushusto a panagserbi kadakuada. Imbatadna pay  a babaen iti panagkaykaysa  ti tulbek iti pannakagun-od iti agtultuloy a  natimpuyog ken  panagasenso ti ili a Cabugao.

Sakbayna, nagsapata  ni 2nd Term Vice Mayor  Deogracias Jose Victorino “DJ” H. Savellano a binayabay ni Mrs. Patricia Savellano-Singson  a kabsatna. Pinagsapata ni Congressman Deogracias Victor “DV” B. Savellano. Nangipaay met ti Mensahe ni Vice Mayor DJ. Nagyaman kadagiti umili iti agtultuloy a suportada kenkuana ket bininsana ti pateg iti panagkaykaysa a mangpadur-as pay ti ili a Cabugao.

Naisaganad a nagsapata dagiti nabutosan a kameng ti Sangguniang Bayan ti ili a Cabugao a da:  Hon. Danilo Q. Gazmen; Hon. Vicky S. Serna; Hon. Jayhan Charisma A. Tan;  Hon. Dr. Jemaima S. Tan Yee; Hon. Atty. Bryan Jett S. Pano; Hon. Josefina S. Vallejo; Hon. Atty. Randy B. Kinaud ken ni Hon. Dodjie S. Santella. Pinagsapata ida ni Mayor Ediboy iti imatang ti amin a naitaripnong iti uneg ti Simbaan.

Kalpasan daytoy, naituloy ti programa ti “Panagsapata 2016”  iti Cabugao Cultural and Sports Complex.

Naluktan ti programa babaen iti panagsarita ni SBM Vicky S. Serna. Naisaruno a naibasa ken naited ti Resolution of Commendation ti Sangguniang Bayan ken ni outgoing SBM Benedicto M. Savellano iti nabunga a gapuananna iti lehislatura ti ili iti uneg ti siam a tawen (tallo a termino). Kalpasanna, inyawatda ti kopia ti resolusion iti pasado-konsehal babaen kada Congressman Ronald V. Singson; Mayor Ediboy; Mayor Josh Edward; Vice Mayor DJ;  ken ni SP Mika S. Mendoza ken binayabay dagiti Konsehales ti ili. 

Simmaruno ti turnover iti simbolo ti liderato ken responsibilidad babaen iti panangyawat ni Mayor Ediboy ken ni Mayor Josh Edward.

Naibasa ti Resolusion iti SB ti ili a Cabugao  a naglaon iti pannakapadayaw ni Mayor Ediboy iti innem a tawen a panagtakemna a Mayor ti ili a napno ti  gapuanan iti  panagsayaat ti ili ken dagiti umili, napudno a panagserbi ken napintas a rekordna iti inna panangidaulo. Daytoy a Resolusion ket inyawat dagiti kameng ti Konseho Munisipal nga idauluan ni Vice Mayor DJ Savellano ken nakikaysa ni Mayor Josh Edward S. Cobangbang.

Iti Mensahe ni  Mayor Ediboy, kimmablaaw ken nagyaman iti aglaplapusanan a talek, ayat ken suporta dagiti umili iti innem a tawen a panagtakemna a Mayor. Kunana nga awan ti pangisukatanna kadaytoy a nagun-odna ket dinakamatna a malaksid kadagiti makitkita a nagluposanen  ti ili ket agyamyaman unay ta uray dagiti ug-ugali dagiti kakailianna ket naglupos met ta agkikinnaawatandan,   agkikinnaasida ken agtitinnulongda agsipud ta awan ti naidumduma iti panagsagrap kadagiti pagimbagan a naiserbi kadakuada.

Nangted met ti mensahena ni outgoing SBM Benedicto M. Savellano. Pinagyamananna ti naited kenkuana a pammadayaw iti panagserbina iti Konseho iti unos ti  siam a Tawen (2007-2016). 

Pannakaited ti Words of Gratitude ti inakem ni SBM Danny Q. Gazmen. Pinagyamananna iti naannayas a pannakaaramid ti “Panagsapata 2016” kasta metten iti umay a panangimatang dagiti umili, sangaili ken Opisiales ti Gobierno Probinsial.

Nakikaysa met iti nasao a seremonia  da Congressman Ronald V. Singson; SPM Mika S. Mendoza;  San Juan Mayor Benjamin Sarmiento;  MLGO Officer Constancia L. Quinola; ABC President Thaddeus “Teddy”  U. Soller;  dagiti Principal/School Heads ken dagiti mangisursuro  iti nadumaduma a pageskuelaan-Elementaria ken High Schools ti ili a Cabugao nga idauluan ni Public Schools District  Supervisor Dr. Consesa T. Rumias, D.Ed.; Former Mayors  Dely Soller-Tan ken Bendell Soller-Tan; Mr. & Mrs. Jeremy Seguban; dagiti kameng ti Municipal Police Station ken ti BFP  a nangtarawidwid ti seguridad nga idauluan ni PSI Ramil A. Llarenas ken kasta metten dagiti kameng ti  Cabugao Rescue Team ken  dagiti Mediamen.

Nagpaay nga Emcee/Facilitator da Mr. Rommel Santella ken ni Mr. Gilbert Asuncion, agpada a mangisursuro kadagiti seremonia a naaramid. # (Web In-Action)

CLICK HERE TO VIEW MORE PHOTOS