Cabugao, Ilocos Sur – Naangay ti pannakabendision ken cutting of ribbon ti baro a pasdek ti pageskuelaan iti Cabugao South Central School iti Hulio 14, 2016 iti Brgy. Bonifacio, Cabugao, Ilocos Sur.
Immuna a naangay ti Nasantuan a Misa nga inannong ni Rev. Fr. Felix Costales iti School Stage and Auditorium a nagatendaran dagiti agbasbasa; mangisursuro; ken dagiti nagannak sa binendisionan ti Kura Paroko ti baro a classroom building babaen iti panangbayabay kenkuana dagiti mangisursuro iti DepED; Barangay Officials, PTA Officers ken Opisiales ti LGU-Cabugao.
Simmaruno a naaramid ti seremonia ti pannakagetteng ti laso ti baro a pasdek babaen kada Mayor Josh Edward S. Cobangbang ken ni Mr. Kim Jeah Hong, Project Manager, Kyeryong- J. D. Policarpio (Joint Ventures) nga inimatangan dagiti Opisiales ti Ili; Pasado Mayor Edgardo “Ediboy” S. Cobangbang, Jr.; Pamilia-DepED; Opisiales ti Barangay, PTA Officers and Members.
Naisaganad ti naaramid a programa iti uneg ti pasdek. Linuktan ni Mrs. Melvie S. Sajonia, Principal II, ti Cabugao South Central School iti nadakamat a programa. Kimmablaaw ken nagyaman iti Kyeryong-J.D. Policarpio (JV) Management ken iti LGU-Cabugao nga idauluan ni Mayor Josh Edward S. Cobangbang ta adda manen nainayon a pasdek-pageskuelaan a mausar dagiti agbasbasa.
Naisaruno a Certificate of Acceptance ti pagadalan iti naited a proyekto ken iti Token a maisagut iti Kyeryong-J.D. Policarpio (JV).
Naisaganad ti turnover ti papeles ti pasdek iti pageskuelaan ti Cabugao South Central School babaen iti panaginnawat da Project Manager ken ti Principal ti pagadalan nga inimatangan da Mayor Josh Edward ken ni PTA President Walberto Torres.
Naited met ti Certificate of Acceptance ti pagadalan iti naited a proyekto ken iti Token a maisagut iti Kyeryong-J.D. Policarpio (JV).
Nangipaay ti Mensahe ni Mayor Josh. Kimmablaw ken nagyaman. Innayonna a babaen iti agtultuloy a panaggagayyem ket maipasdek dagiti kasapulan ti eskuela sa maitultuloy latta ti good guidance ken good teaching ket maikkan ti importansia dagiti agad-adal nga isuda ti manamnama a sanggir iti masakbayan.
Nangited met ti Mensahena ni Mayor Ediboy. Kimmablaaw ken nagyaman kadagiti amin a nagatendar iti inagorasion. Imbatadna nga iti pannakagun-od daytoy a proyekto ket lungalong dagiti maseknan a dadaulo ken personalidad ti eskuela ken ti PTA ket insupusopna a pariknaan latta koma ti amin iti napintas a pannakilangen kadagiti nagited tapno maikiddawto manen ti sabali a proyekto a kas iti paglinongan iti pageskuelaan.
Nagsarita met ti pannakabagi ti Kyeryong-J.D. Policarpio (JV) ket imbatadna ti kalikagum ti kompaniada a pannakikaysada kadagiti ahensia a kas iti LGU; Barangay ken ti DepED ta kayatda a mataginayon ti mabukel a panaggagayyem iti nagbabaetanda. Bininsa pay ti Spokesman ti kompania ti pateg iti pannakaited ti kasapulan dagiti agad-adal ta isuda ti namnama ti masakbayan.
Words of Gratitude ti inakem ni PTA President Walberto Torres. Pinagyamananna daytoy a naited a proyekto babaen iti dakkel nga akem ti napalabas nga administrasion nga indauluan ni Mayor Ediboy kasta metten daytoy agdama nga idauluan ni Mayor Josh Edward. Maragsakan ti PTA President a nangipeksa a babaen iti agtultuloy a panagkaykaysa dagitoy nga institusion ket sumayaat ti pageskuelaan iti partikular ken pagimbagan iti amin nga umili iti Munisipalidad.
Nagatendar iti nadakamat a blessing and cutting of ribbon da Vice Mayor DJ Savellano; SBM Atty. Bryan Jett S.Pano; SBM Danny Q. Gazmen; SBM Vicky S. Serna; SBM Atty. Randy B. Kinaud; ABC President Thaddeus U. Soller; Brgy. Captain Valentin S. Tuyor, Jr. kasta metten dagiti Head Teacher ken Principal ti dadduma a pagadalan ti ili. # (Web In-Action)
No comments:
Post a Comment