Cabugao, Ilocos Sur – Imbatad ni Acting Municipal Agriculturist Robert S. Savella a kaaduan iti 1,050 a mannalon ti mais ti nakaapit iti 6 Tons ti kada ektaria itay napalabas a Dry Crop 2015-2016 (Nobiembre-Marso). Innayon ni Mr. Savella nga umabot ti 450 Ektaria ti namulaan ti mais (Ryan Corn) iti intero a Munisipalidad a buklen ti dua a cluster ti ili a Cabugao, Ilocos Sur nga itandudo da Mr. Reynold Sabio ken ni Mr. Jimmy Seguban.
Sakbayna, naangay ti panangmiting ti DA-Provincial (OPAG)-Ilocos Sur kadagiti Opisiales ti Asosasion ti agmulmula ti mais (amarilio ken puraw) iti ili a Cabugao, Ilocos Sur idi Enero 21, 2014 iti Municipal Conference Building, Cabugao, Ilocos Sur.
Nagatendar dagiti Corn Planters nga idauluan ni Mr. Dominador Reynold S. Sabio tapno mareorganisar pay ti Pederasion (Municipal-based) iti agmulmula ti mais iti ili ti Cabugao.
Adda met idi pannakabagi ti OPAG-Ilocos Sur a da Mr. Oscar Tobia, Provincial Corn Coordinator ken ni Engr. Jojo Acance, mangay-aywan ti kasasaad dagiti naited a ramit ken makinaria manipud iti DA kadagiti Asosasion ti mannalon iti amin nga ili.
Dagiti natratar ken napagnunumuan sakbay ti eleksion para iti Baro nga Opisiales ti Cabugao Corn Cluster:
1. Sinimpuon ni Mr. Tobia no apay nga adda programa ti Corn Cluster ti Provincial Government. Kinunana a ti “Cluster” ket buklen ti 200 ektarias nga agdedenna a pagmulaan ti mais iti kada ili. Innayonna a mabukel met ti Non-Cluster Associaton iti napagsisina a disso ti pagmaisan nangruna iti barangay ket maorganisarda a makitipon iti Pederasion ti Corn Planters ti kada ili.
2. Imbinsa ni Mr. Tobia dagiti programa, proyekto, annuroten ken benepisio iti mannalon a makipaset kadaytoy a programa ti Gobierno Probinsial iti panangidaulo ni Gov. Ryan Luis V. Singson.
Kangrunaan a trinatar idi ti DA Official iti wagas ti panaglako iti produkto a mais babaen iti panangipasiguradona a tumulong ti Gobierno Probinsial babaen ti “Ryan Corn Program” ti Gobernador kadaytoy a kangrunaan a pakaseknan dagiti mannalon iti produktoda a mais.
Dinakamat pay idi ni Mr. Tobia iti panangyuna ti LGU Cabugao a nagipatungpal/nakairingpas iti Soil Fertility Mapping Project nga aramidento pay laeng ti dadduma nga ili ti Ilocos Sur. Insupusop pay ti DA Corn Coordinator a napateg daytoy a paset ti Corn Program ket insaritana a nagasat dagiti Corn Planters ditoy LGU Cabugao nga idauluan ni Mayor Edgardo S. Cobangbang, Jr. ta nairusaten ti Soil Fertility Mapping Program gapu iti naan-anay a suporta ti LGU kadagiti mannalon ken kadagiti programa ti DA.
Kabayatanna, napili ni Mr. Jimmy Seguban, agnaed iti Sitio Rebba, Brgy. Cacadiran, Cabugao, Ilocos Sur a baro a Presidente ti Cabugao Corn Cluster a nangsakup iti amin nga agmulmula ti mais iti 33 a barangay ti ili a Cabugao ken maikamengda iti Ilocos Sur Federation of Corn Growers Association nga agdama a miembro ditoy ti Turod MPC nga idauluan ni Brgy. Captain Inocencio S. Sadac ken ti Sagayaden Free Farmers MPCI.
Kanaig daytoy, innala dagiti mannalon iti 33 a barangay a tinarabay dagiti Farmer Leaders ken Barangay Officials ti ili a Cabugao, Ilocos Sur iti sango ti Presidencia (Municipal Hall idi Oktubre 9, 2015 ket inawatda iti mabatayanda iti naiwaras a Ryan Corn (LVN 10) Seeds nga inted ti Provincial Government iti panangidaulo ni Governor Ryan Luis V. Singson.
Dagitoy a programa iti pannakaidur-as ti produksion ti mais ket itultuloy nga ipatungpal ti kabarbaro nga Administrasion ti ili nga idauluan ni Mayor Josh Edward S. Cobangbang. # (Web In-Action)
No comments:
Post a Comment