Cabugao, Ilocos Sur – Nagatendar ni Mayor Josh Edward S. Cobangbang iti umuna a panag-session dagiti kameng ti Sangguniang Bayan ti ili a Cabugao, Ilocos Sur iti kabarbaro nga Administrasion ti Ili a Cabugao idi Hulio 4, 2016 a naangay iti SB-ABC Building, Cabugao, Ilocos Sur.
Iti Inaugural Speech ni Mayor Josh, bininsana ti pateg iti panangsango iti agtultuloy a pannakaipaay ken pannakaitandudo iti naan-anay a serbisio para kadagiti umili ket mailaksid pay la koma ti partisanship ta agtitinnulongda koma a mangpanunot iti napipintas a mapanday a linteg a mangted iti mainayon pay a pagimbagan dagiti umili.
Innayon pay ni Mayor Josh a silulukat met ti Opisinana a mangawat ken mangadal kadagiti suhestion ken lungalong nga aggapu kadagiti agpampanday ti linteg no la ket para iti pagsayaatan ti kaaduan.
Inulitna a pinagyamanan iti naited nga aglaplapusanan nga ayat ken talek dagiti umili kenkuana ket subadanna met iti husto a panagserbisio kadakuada babaen iti panagdanggay ti Ehekutibo ken ti Lehislatura a benneg iti Gobierno Lokal daytoy nga ili. # (Web In-Action)
No comments:
Post a Comment