Cabugao, Ilocos Sur – Mairugi ti 15 nga aldaw a panagsanay dagiti 4Ps Beneficiaries manipud kadagiti barangay ti ili a Cabugao, Ilocos Sur mangrugi iti Hulio 12, 2016 ken agpatingga inton Agosto 1, 2016 ket naangay ti umuna nga aldaw ti panagsanayda iti Municipal Hall, Cabugao, Ilocos Sur.
Umabot ti 47 a 4 Ps Trainees ti naiprograma nga agpartisipar kadaytoy a kurso nga igannuat ti Sustainable Livelihood Program (SLP) ti DSWD ken nakikammayetan ti LGU-Cabugao nga idauluan ni Mayor Josh Edward S. Cobangbang para kadagiti makasapul iti panggedanda a marigrigat nga umili kadagiti Barangay ti ili.
Iti nasao a panagrugi ti panagsanay, nagatendar da Mrs. Wilma S. Cruz, Focal Person ti SLP Cabugao; Miss Aida S. Cueto ken ni Mr. Dennis P. Aguimbag, SLP-PDO ti SLP-DSWD kasta metten dagiti Staff ti 4 Ps Municipal Operations Office (MOO)-Cabugao.
Nagatendar ni Mayor Josh Edward S. Cobangbang ket nangited ti mensahena para kadagiti agsanay. Kimmablaaw ken nagyaman ta maitultuloy dagitoy a programa ti DSWD ditoy Cabugao ta adu ti matulonganna nga agkasapulan ti pamataudan ti nayon ti pagbiaganda. Pinagyamananna dagiti Opisiales ti DSWD ken dagiti mangipatungpal iti LGU ket komplementaran met ti Munisipio dagiti dadduma pay a kasapulan iti panag-training dagiti partisipantes. Innayon pay ni Mayor Josh a matulonganda pay a mangisapul ti magun-odda a kabaelan tapno naan-anay iti pannakaited ti tarabay ken tulong kadakuada nga agsanay.
Iti umuna nga aldaw ti panagsanay, nangited ti Briefing ni Mr. Aguimbag maipapan iti pakabuklan ti programa ti SLP iti DSWD ken nailawlawag met ti pagrebbengan nga aramiden dagiti agsanay kabayatan iti training period. # (Web In-Action)
No comments:
Post a Comment