Cabugao, Ilocos Sur – Nagmiting dagiti Barangay Nutrition Scholar (BNS) idi Hulio 21, 2016 tapno makikammayetda kadagiti Opisiales ti LGU-Cabugao nga idauluan ni Mayor Josh Edward S. Cobangbang iti pakaseknan ti agtultuloy a trabahoda iti Tawen 2016.
Nagatendar dagiti Kapitanes ti barangay a nangtarabay kadagiti BNS-da.
Indauluan ni Mrs. Gloria T. Segui, Presidente, dagiti Barangay Nutrition Scholar (BNS) a nagtataripnong iti Municipal Hall Building ken tinarabay ida ni MSWD Officer Mrs. Lydia S. Gazmen, agak-akem a Municipal Nutrition Action Officer.
Iti panagsarita ni ABC President Thaddeus U. Soller, bininsana ti pateg ti agtultuloy a programa ti Munisipio pakaseknan iti Nutrision kadagiti ubbing nga agtawen iti 0-6 ken iti agtultuloy a pananglapped ti iyaadu ti agsagsagaba ti malnutrision nga umili.
Innayonna nga iti maaramid a Re-evaluation dagiti BNS, kasapulan a birokenda dagiti mainayon nga ubbing nga agsagsagaba iti malnutrision iti masakupanda ken ammuenda ti kasasaad dagiti nagannak kadagitoy tapno mairamanda a maikkan iti pagsapulan. Iti kasta, naan-anay ti pannakatulongda a mangpaadda iti nasustansia a pagtaraonda.
Insupusop ti ABC President a kasapulan nga agatendar ti BNS iti sesion ti Konseho ti Barangay tapno idatagda dagiti pakaseknan ti trabahoda ken kiddawenda iti tulong ti barangay kadagiti dadduma pay a kasapulanda. Innayonna a kasapulan ti Teamwork iti pannakaipatungpal dagitoy a gannuat.
Nailungalong pay iti amin a nagatendar a manayonan pay ti 6 a bulan iti dati nga innem a bulan a pannakaipatungpal ti Supplemental Feeding Program kadagiti Day Care Center.
Nagsarita met ni Mayor Josh Edward. Kimmablaaw ken nagyaman iti amin a nagatendar. Kalikagumna a babaen iti napintas a koordinasion ti amin a maseknan nga Ahensia ken pannakitinnulong dagiti Opisiales ti Barangay ket masolbar iti parikut ti malnutrision.
Nagsarita pay iti maipapan ti panangmantener ti nutrision da SBM Vicky S. Serna, Vice Chairman, Committee on Health and Nutrition ken ni Ms. Edith Castillo, retirado nga Opisial ti Gobierno Probinsial.
Kamaudianan ti miting ket iti pannakai-turnover dagiti Weighing Scale kadagiti BNS babaen iti panangiyallawat ni Mayor Josh Edward a kaduana dagiti Kapitanes ti Barangay ken dagiti Opisiales ti ili ken iti Asosasion ti BNS. # (Web In-Action)
No comments:
Post a Comment