Friday, July 8, 2016

NASIBETEN TI EL NINO; TUDTUDO, MAPALAWA TI MATALON

Cabugao, Ilocos Sur – Iti panakaisar-ong ti Web In-Action kadagiti barangay ti Munisipalidad, naammuan kadagiti mannalon nga iti panagbuslon ti tudo, main-inutanda a mapalawa ti matalonda  iti  Wet Season 2016 (Hunio-Nobiembre). 

Naammuan pay nga adda maitulongna iti naited kadakuada a libre a  bukel ti Ryan Rice ken Organic Fertilizer  babaen iti programa ti Gobierno Munisipal ken ti DA-RFO 1  a mausar iti panagpadakkelda  iti mairaepda.

Maibasar iti gunay ti DA-LGU iti daytoy a panagtatalon, imbatad ni Municipal Rice Program Coordinator Nereo S. Daproza  a kaaduanen iti umabot ti 4,600 a bilang ti mannalon a mangbukel kadagiti  35 a rehistrado nga  asosasion ti mannalon iti naikkan ti pamalpalatpatan iti Cropping Calendar & Pattern of Planting iti Wet Season 2016 babaen iti maulit-ulit a meeting ken Technical Briefing ti Palay Check Session iti kada barangay/asosasion.

Nupay kasta, kaaduan a mannalon ti agpannuray  iti tulong ti tudo iti panagtalonda kadagiti 1, 283 ektaria a rainfed area ken umabot ti 971 ektaria a mataltalon iti irrigated area.

Innayon ni Mr. Daproza a manamnama a matalon ita ti ag-2,204 ektaria  a dati a mataltalon iti intero a Munisipalidad. Kanaig daytoy, nailunsaden dagiti Municipal Techno-Demo Farms kadagiti estratehiko a lugar kasta metten ti Farmers Field School (FFS)  in Rice Production a pakaibilangan sadiay Brgy. Bungro. Dagitoy a demonstration area ti panagtalon ket tinawen a maar-aramid iti kada strategic area a pagtuladan dagiti mannalon.

Inulit ni Mr. Daproza nga imbaga a manam-ayan dagiti mannalon ta tunggal asosasion ket naikkanda  iti pagsusublatanda a ramit a pagtalon kas iti hand tractor (kuliglig) iti kaaduan, hose ken makina (water pump)  a pagpakunot ti danum iti aminen nga asosasion babaen iti panangpataud  ti DA-RFO 1 ken ti LGU-Cabugao kadagitoy a pagimbagan dagiti mannalon iti kallabes nga Administrasion  ti ili.

Dagitoy nga aksion ken inisiatiba ket resulta ti napintek a programa ti Gobierno Munisipal nga itultuloy nga idauluan ni Mayor Josh Edward  S. Cobangbang  tapno makomplementaran ti gaget dagiti mannalon nga agpataud ti umanay a suplay a pagtaraon dagiti umili ken manayonan   ti masapulanda agsipud ta mayoridad dagiti umili ti agdepende iti kangrunaan a  pagbiaganda iti Agrikultura ditoy nga ili. # (Web Situational Report)

No comments:

Post a Comment