Monday, July 18, 2016

PANNAKA-INSURE DAGITI MULA A PAGAY ITI WS 2016, NAILEPPAS

Cabugao, Ilocos Sur  - Naaboten ti DA-LGU Cabugao  ti  inted ti PCIC nga alokasion ditoy nga ili pakaseknan iti pannaka-insure dagiti mulada a pagay iti Wet Season 2016 (Hunio-Nobiembre).

Umabot ti 800 a bilang ti mannalon iti nakoberan ti Philippine Crop Insurance Corporation (PCIC) a nakaraepan  iti nasurok a 2,000 nga ektaria ti natalon.

Sakbayna, impamaysa  dagiti Staff ti DA-LGU Cabugao nga idauluan ni Acting Municipal Agriculturist  Robert S. Savella a dinanon dagiti mannalon (by schedule) iti 33 a barangay ti Munisipalidad ti Cabugao  ket  tinulonganda dagiti PCIC Staff kadagiti papeles iti pannaka-insure dagiti mulada a pagay ita a Wet Season 2016 (Hunio-Nobiembre).

Nupay kasta, awan ti rimsua a problema iti panangaksion ti PCIC kadagiti pakaseknan dagiti mannalon iti  Dry Season 2015-2016 (Disiembre-Mayo) ta nabayadan dagiti “crop damages” a napabisita babaen iti panagtinnulong dagiti mannalon, Staff ti DA-LGU ken dagiti pannakabagi ti PCIC iti babaen ti Departamento ti Agrikultura (DA).

Dagitoy nga aksion ket resulta iti nakammayet  a programa ti Gobierno Munisipal nga itultuloy nga ipatungpal ni Mayor Josh Edward S. Cobangbang  ken iti DA-RFO 1-PCIC  tapno matulongan dagiti mannalon/umili  iti pannakaital-o  ti panagbiagda  babaen iti mainayon  a matgedanda. # (Web In-Action)

No comments:

Post a Comment