Cabugao, Ilocos Sur – Nakikaysa ni Mayor Josh Edward S. Cobangbang iti naangay a miting ti Cabugao Federated Farmers Association nga idauluan ni Mr. Elmer Guerrero Bromeo, Federated President iti Municipal Conference Building, Cabugao, Ilocos Sur iti Hulio 5, 2016.
Nakikaysa ni Mayor Josh kadagiti dadaulo ti mannalon. Iti mensahena, kinablaawanna ken nagyaman kadagiti mannalon iti agtultuloy a kinatunosda ken mangpapigsa ti hanay-da a mangirepresentar iti mayoridad a sektor ti ili a Cabugao.
Nakinaming dagiti mannalon ken ni Mayor Josh babaen iti panangitedda kadagiti plano ken pakaseknan iti tunggal asosasion a mangbukel ti Pederasion.
Inikkan pay ti Ama ti Ili iti importansia dagiti kalikagum a gun-oden dagiti mannalon/asosasion babaen iti panangawatna kadagitoy ket maikkan ti panawen ti Munisipio a mangistudiar kadagitoy a pagkasapulan.
Impeksa pay ti Alkalde Munisipal iti napintas koma a turongen ti programa a mangpasayaat pay ti kasasaad dagiti mannalon ken mangngalap gapu iti manamnama a pannakaited dagiti mailungalong a proyekto a makiddaw.
Pinaregta ni Mayor Josh dagiti lideres ti mannalon a pagtalinaedenda a natibker ken napintas ti rekord ti asosasionda tapno agtultuloy latta met ti talek dagiti maseknan nga Ahensia kas iti DA nga agited ti tulong ken proyekto.
Naaramid ti ceremonial turnover dagiti organic fertilizer bags nga ited ti Munisipio kadagiti mannalon kas nayon a pamuonanda iti panagtalonda iti Wet Season 2016 (Hunio-Nobiembre).
Simmaruno a naangay ti meeting proper dagiti Opisiales ket trinatar-da dagiti pakaseknan/agenda iti Pederasion ken dagiti baro a padamag-da para iti pagsayaatan dagiti mannalon.
Nangipaay ti pammalagip ken pammagbaga ni ABC President Thaddeus U. Soller kadagiti lideres ti mannalon iti pakaseknan ti panangpasayaat ti membership ken panangpadur-as pay kadagiti asosasion babaen iti nakammayet a panagtinnarabay dagiti Farmers Association ken iti Konseho ti Barangay.
Nagatendar dagiti Staff ti DA-LGU nga idauluan ni Acting Municipal Agriculturist Robert S. Savella ken ni MAFC Chairman Rogelio Barlolong. # (Web In-Action)
No comments:
Post a Comment