Cabugao, Ilocos Sur – Ti Local Government Unit (LGU)-Cabugao babaen iti kabarbaro nga Administrasion nga idauluan ni Mayor Josh Edward S. Cobangbang ket makikaysa iti amin nga Ahensia/Opisina ken iti sapasap iti pannakaobserbar ti kaipapanan ti Nutrition Month iti bulan ti Hulio 2016 babaen iti Tema: “First 1000 Days ni baby pahalagahan para sa malusog na kinabukasan.”
Babaen itoy, agkakammayet dagiti nadumaduma nga Ahensia/Opisina iti programada iti “Feeding Program” a paset ti aktibidadda a maipatungpal iti bulan ti Hulio 2016.
Iti pannakiuman ti Web In-Action kadagiti Barangay Nutrition Scholars (BNS) itay nabiit, imbatadda a dadduma nga aktibidad-da a maigannuat iti bulan ti Hulio 2016 kadagiti 33 a barangay ken 26 a pageskuelaan ti Munisipalidad ket iti Backyard/home, school and Community Gardening, Mother’s Class, Nutrition Education, Pabasa sa Nutrisyon ken Supplemental Feeding ti dadduma nga ubbing nga adda rekordna iti mal-nutrision.
Innayonda a makiko-koordinarda met kadagiti Opisiales ti barangay iti pannakaipatungpal dagiti nadakamat nga aktibidades-da.
Dagitoy nga aksion ken inisiatiba ket babaen iti agtultuloy a panangilungalong ti Gobierno Munisipal nga idauluan ni Mayor Josh Edward S. Cobangbang a mapagkaykaysa ti puersa a sakupen ti Municipal Nutrition Council Committee nga idauluanna kadagiti Ahensia ken Opisina nga adda iti salinong ti LGU a mangipaganetget ti kaipapanan ken sagudayen ti programa kadagiti barangay tapno matun-oyan dagiti kangrunaan a turongen iti panggep a pananglapped ti malnutrision ken panangikkat ti panagbisin kadagiti ubbing ken inna. # (Web In-Action)
No comments:
Post a Comment