Cabugao, Ilocos Sur – Makikaysa ti LGU-Cabugao ti pannakaselebrar ti sangkapagilian a
National Disaster Consciousness Month babaen iti Tema: "Kahandaan at Pagtugon sa Sakuna, Tungkulin ng Bawat Isa".
Nakasagana ita nga agtignay ti puersa ti Municipal Disaster Risk Reduction and Management Council (MDRRMC) ti ili a Cabugao nga idauluan ni Mayor Josh Edward S. Cobangbang, Chairperson ken imatonan ni Engr. Nestor B. Somera no inkaso a dumteng ti kalamidad. Kasta met iti panangisaganada iti Operation Center ken kasapulanda a mausar ditoy Munisipio no kontaken dagiti natudingan a katinnulongda kadagiti calamity prone areas iti Barangay ken Poblasion babaen iti Hot Lines.
Daytoy a panagsagana ket maiturong iti bigla nga isusungad dagiti kalamidad/insidente kas iti bagyo, nakaro a tudtudo, layus, tikag, uram, desgrasia ken kanaigna a didigra iti masungad a bulbulan no adda man.
Bigbigen ni Mayor Josh ti naindaklan nga akem daytoy a sanga ti LGU a mangprebentar ken mangalay-ay kadagiti pagpeggadan ti biag dagiti umili babaen iti sistematiko a panangaksionda no adda mapasamak a kalamidad ken desgrasia iti las-ud ti Munisipalidad.
Gapu itoy, paset ti pannakapatibker daytoy a Konseho iti pannaka-update dagiti mangbukbukel ti Skeletal Force ken pannakainayon dagiti matalek a kameng a mangpapigsa ti grupoda nga agtarabay iti panawen ti kalamidad.
Iti pannakiuman ti Web In-Action itay nabiit, imbatad ni Engr. Nestor B. Somera a malaksid iti panangalertoda kadagiti kakaduada a mangbukel ti MDRRMC iti Munisipio nga agmobilisar/agmonitor iti aw-away agingga iti Poblasion no dumteng ti kalamidad, mangrugi iti bulan ti Hulio ket adda matudingan a dua a kameng ti Cabugao Rescue Team nga ag-duty iti tunggal rabii.
Malaksid itoy, rinugianen da Engr. Somera ti mapan aglektiur kadagiti barangay maipapan iti disaster preparedness ken rescue management tapno maikkan ti pamalpalatpatan dagiti bumarangay kangrunaan dagiti kameng ti BDRRMC a katulonganda iti panawen ti kalamidad.
Dagitoy nga aksion ken inisiatiba ket gubuayen ti nasapa a panagsagana iti panawen ti emerhensia tapno maprotektaran ken maalay-ayan ti epekto dagiti dumteng a kalamidad babaen iti madagdagus a panangtarabay ti Gobierno Munisipal nga idauluan ni Mayor Mayor Josh Edward S. Cobangbang. # (Web In-Action)
No comments:
Post a Comment