Cabugao, Ilocos Sur – Iti pannakiuman ti Web In-Action idi Hulio 18, 2016, imbatad ni Dr. Melvin Castro, DVM, Municipal Livestock Coordinator nga agtultuloy ti pannakaidanon ti serbisio ti Beterinario kadagiti agsakit nga ayup ken dinguen no la ket ta maipakaammo iti Opisina ti Municipal Agriculture Office ti ili.
Agtultuloy met ti pannakabakuna dagiti aso iti Anti-rabies ken ayup a pangkontra ti sakit.
Nupay kasta, innayon ni Dr. Castro a zero incidence ditoy nga ili iti ephemeral fever (dengue) ditoy Cabugao a daytoy ti agraraira ita a sakit dagiti large cattle iti lokalidad.
Insupusop ni Dr. Castro kadagiti lumugar iti barangay a pappapananna a pagtalinaedenda koma a nadalus dagiti panganan ken bagi dagiti ayup ken dinguen tapno malapdan ti itataud ti sakit. Kasta met koma a maipaayan ti natalged a pagaponan/pagyanan dagiti ayup ken dinguen ken masalaknibanda iti nakaro a pudot ken lamiis wenno pannakababasa.
Iti panagasikaso iti Livestock Sector, kidkiddawenna pay iti pannakitunos koma dagiti mannalon a mangsabat kadagiti programa ti Munisipio/Probinsia iti panangpasayaat iti industria ti animales iti Munisipalidad.
Dagitoy nga aksion ket resulta iti nakammayet a programa ti Gobierno Munisipal nga itultuloy nga ipatungpal ni Mayor Josh Edward S. Cobangbang tapno matulongan dagiti mannalon/umili iti mainayon a matgedanda iti panagtarakenan ti ayup ken dinguen. # (Web Situational Report)
No comments:
Post a Comment