Wednesday, November 21, 2012

PANAGDALUS TI KALSADA ITI BARANGAY, INLUNGALONG NI MENRO

Cabugao, Ilocos Sur – Rinugian ni MENRO Edgar S. Balangatan a nakikoordinar kadagiti Opisiales ti  Barangay nangruna  kadagiti barangay nga asideg  ti Poblasion babaen ti panangyuna  ti Brgy. Turod a malasatan  ti Kalsada Probinsial nga agpa-Brgy. Salomague.

Imbatad ni MENRO Balangatan a saan laeng nga iti Kalsada Nasional ti ipangrunada/pakaseknanda a mamantener ti pannakadalusda no di pay ket  dagiti “busy streets” a kumamang iti Poblasion tapno napintas a buyaen dagiti sangaili ken balikbayan a maisar-ong iti Munisipalidad.

Iti pannaki-amad ti Web In Action iti Nobiembre 21, 2012, nairugi ti panagdalus iti agsumbangir ti igid ti Kalsada Probinsial ken sumrekan  iti Sitio Abquir a kalsada babaen ti panangiwardas dagiti Opisiales ti Barangay nga idauluan ni Brgy. Captain Inocencio S. Sadac ti Barangay Turod. 

Manamnama  ti panangtulad met dagiti dadduma met a barangay iti Barangay Turod tapno agtultuloy a mamantener ti kinadalus ti aglawlaw nangruna ta umadanin ti Paskua. # (Web Situational Report)

No comments:

Post a Comment