Wednesday, November 7, 2012

UNIT ATHLETIC MEET 2012, UMUNA ITI DUA NGA ALDAW

Cabugao, Ilocos Sur – Naangay ti Unit 1 Athletic Meet 2012 sadiay Brgy. Pagsanaan Norte-Miramar, Magsingal Ilocos Sur mangrugi ita  a Nobiembre 6, 2012 agingga iti Nobiembre 7, 2012  a nagpartisiparan dagiti atleta, coaches, umpires ken  officiating officials kasta met dagiti  Opisiales ti LGU’s iti Magsingal, Cabugao, San Juan ken Sinait.

Iti umuna nga aldaw, Nobiembre 6, 2012, nagparada dagiti Delegado ti 4 nga   ili nga inyuna dagiti Marshall, kasta met dagiti High School Athletic Delegations  (Sinait National High Schoo-Sinait; Cabugao Institute, Sisim National High School-Cabugao, Magsingal National High School-Magsingal, ken San Juan NHS-San Juan)   ken Officiating Officials ( Elementary & High School)  iti aglikmut ti Athletic Ground iti Pagsanaan-Miramar Football Ground.

Iti pakauna a Programa, inakem ni Mrs. Lorelie Ann C. Rosario, Teacher II ti Prayer ken National Anthem ti indauluan ni Mrs. Aurora U. Urcia. Nabara ti pammasangbay a balikas da Pagsanaan Brgy. Captain Gregorio Ocillos ken Miramar Brgy. Captain Arnel Renon a nagsaruno a nagsarita.

Imbagian ni Magsingal Vice Mayor Alrico A. Favis ni Mayor Arlyn A. Favis a nangited ti mensahena. Kimmablaaw ti Bise Mayor  ken imburayna ti padasna kas maysa nga atleta a nakatulong kenkuana  a nangpatan-ay ti kabaelanna sakbay  a nagbalin a lider. Impeksana ti  naimpusuan a panangpasangbayna iti amin a delegado ken bisita  ket imbatadna a lalaingenda tapno magun-odda ti balligi agingga idiay Provincial Meet.
 
 

Nangipaay met ti mensahena ni Mayor Edgardo “Ediboy” S. Cobangbang, Jr. ti ili a Cabugao. Kimmablaaw ti Alkalde  kadagiti amin nga atleta, opisiales ti ay-ayam, padana nga Opisiales ti Ili a naitabuno ken Opisiales ti Sports iti DepEd District/Division Office. Napakumbaba ni Mayor Ediboy a nangapresiar ti kabaelan dagiti atleta ti Cabugao ken  mangdepensa ti panangabakda iti napalabas a Unit Athletic Meet. Sportsmanship, mapatibker  pay a  panagsisinninged ken panagkaykaysa  ti anag ti mensahena para kadagiti amin a nakipaset kadaytoy   dakkel nga aktibidad ti sports iti uppat nga ili.

 Naisaganad ti presentation of athletic delegates babaen kadagiti District Supervisors/pannakabagida iti tungal ili ken High School.

Kadua ni Mayor Ediboy ni Vice Mayor Favis a nangisa ti bandera ti Unit 1 Athletic Flag idinto ta ni Mr. Ronel Ubaldo ti kadua ti Ama ti ili ti  Cabugao iti Hoisting ti  Delegation Flag.

Pannakaipamaysa ti urnos ken  disiplina agingga a malpas ti ay-ayam  ken sportsmanship met ti bugas ti mensahe ni San Juan Public Schools District Supervisor Jose P. Bueno, Jr.

Binasa  ni Miss Cherry Joy A. Garcia, R1AA Player manipud iti Magsingal National  High School ti Affirmation of the Amateur Athletic Oath.

Impaay ni Mr. Meneleo Palma, CSEE, EPS 1-PESS iti mensahena a nangibagi ken ni Dr. Marino S. Baytec, Ed. D., CSEE, Schools Division Superintendent. Sinimpuonna  ti linteg a mangituding ti tinawen a pannakaangay ti kastoy nga aktibidad dagiti ubbing iti eskuela elementaria ken sekundaria. Innayonna nga iti dua nga aldaw a panagsasalip ket manamnama a balligi ti resultana a pakaisagutan met laeng ti sapasap a nakipartisipar a pagadalan ken nagbuya nga umili iti Umuna a Distrito ti Probinsia.

Nagpaay nga Emcee iti umuna nga aldaw da Ms. Rose Vitchie R. Calpito, Jefferson T. Ugale ken Marides S. Datu.   # (Web Situational Report)
 
 


No comments:

Post a Comment