Tuesday, November 6, 2012

RODOLFO S. SONIDO LYING-IN CENTER, NAGLUKAT IDI NOBIEMBRE 5, 2012

Cabugao, Ilocos Sur – Nangrugi nga agawat ti pasiente nga inna a masikog nga agpasngay  iti Rodolfo S. Lying-in Center, RHU-Cabugao, Ilocos Sur  idi Nobiembre 5, 2012 ket nangrugi metten  a nag-duty (24 oras) dagiti  49 a volunteer medical personnel, nurses ken midwives. Segun ken ni Mrs. Janet Sison, RHU-Nurse/Supervisor, naorganisar ti eskediul ti panag-duty dagiti medical personnel ken proseso ti pannakaiserrek  ken pannakapalubos ti pasiente kasta met dagiti kasapulan iti pagpaanakan  tapno maiyataday iti direktiba ni Mayor Edgardo “Ediboy” S. Cobangbang, Jr. a marugianen  a maikkan ti serbisio  dagiti agkasapulan ti mayannatup a pannaripato nga agdadagsen nga inna iti ili ti Cabugao ken iti kabangibang a lokalidad.

Innayon ni Mrs. Sison a maiwayatto ti outreach medical information drive ti grupoda  tapno madanon dagiti barbarangay  a pagnaedan/paggapuan dagiti inna nga agkasapulan ti natalged a paganakan.

Manamnama pay nga iti kaadda ti makiddaw ti serbisiona nga Obstetrician ken Pediatrician Doctors iti Lying-in Center ket maaksionan a daras dagiti pagkasapulan a serbisio iti pasiente  a saanen a kasapulan pay a mayallatiw iti sabali a pagagasan.

Ti pannakaipasdek ti Lying-in Center ket prayoridad a programa ti Gobierno Munisipal iti benneg ti salun-at partikular kadagiti maladaga ken inna tapno agtultuloy a natibker ti pamuonan  ti pamilia iti agdama ken iti sumaruno a henerasion ti umili iti  ili a Cabugao. # (Web In-Action)

No comments:

Post a Comment