Friday, November 9, 2012

PHILHEALTH CARDS, NAITED KADAGITI RECIPIENTS

Cabugao, Ilocos Sur – Nagibunong ti Municipal Social Welfare and Development Office (MSWDO) ti LGU-Cabugao iti Philhealth Cards kadagiti nabenepisiaran ti nainayon a makasagrap ti benepisio nga itden ti   4 P’s (Pantawid Pamilyang Pilipino Program) nga umili iti nadumaduma a barangay ti ili a Cabugao, Ilocos Sur idi malem ti Nobiembre 7, 2012 iti Municipal Conference Hall. Nakikaysa ni Mayor Edgardo “Ediboy” S. Cobangbang, Jr. kadagiti recipients a magagaran a makaiggem kadagiti Kard a pagtaklinanda no dumteng kadakuada ti sakit.

Impasagepsep ni Mayor Ediboy a sayaatenda ti agtungpal iti pagannurotan  iti programa ti 4 P’s. Kalikaguman ti Alkalde a makomplementaran dagiti serbisio a maited kadakuada a karaman pay ti Philhealth benefit  babaen iti nasayaat a panangibanagda  ken apresiarenda dagitoy a tulong ken sursuruenda a tuntonen ti karbenganda babaen ti panangprobitsarda ti serbisio kadagiti maseknan nga Ahensia ken ti Gobierno Lokal.

Iti pannaki-amad ti Web In-Action kadagiti recipients, pinagyamananda dagitoy a maitulong kadakuada iti panangilungalong ti  Gobierno Munisipal nga idauluan ni Mayor Ediboy  ket madadaanda a mangannurot  iti mayetnag a pagannurotan tapno maipatungpal a  nasayaat ti programa kas napateg a pammilin   ti Ama ti Ili.

Iti Nobiembre 8, 2012, naituloy ti pannakaiwaras ti Philhealth ID’s  kadagiti saan pay a nakaawat nga umili nga agnaed iti barangay ket naangay  iti Cabugao Cultural and Sports Complex. Inatendaran met laeng ni Mayor Ediboy daytoy a panagtataripnong tapno palagipan ken imatanganna   dagiti umawat kadagitoy a benepisio. 

Naibunong dagiti Philhealth ID’s kadagiti maseknan nga umawat babaen ti panangimaton dagiti  pannakabagi ti MSWDO nga idauluan ni Mrs. Lydia S. Gazmen, MSWD Officer.


Nakikaysa met iti pannakaibunong dagiti Philhealth Cards da Vice Mayor Danny Q. Gazmen,  SB Member Dr. Carlito S. Pano, Committee Chair on Social Services SB Member Vicky S. Serna ken SB Member Benedicto M. Savellano. # (Web In-Action)

No comments:

Post a Comment