Friday, November 23, 2012

FAMILY DEVELOPMENT SESSION, NAARAMID ITI BRGY. PUG-OS


Cabugao, Ilocos Sur -  Naaramid ti Family Development  Session dagiti kameng ti 4 P’s (Pantawid Pamilyang Pilipino Program)  ti Brgy. Pug-os iti Barangay Hall, Barangay Pug-os, Cabugao, Ilocos Sur iti Nobiembre 23, 2012.

          Immuna a nagsarita ni Mr. Gary Visera, DSWD Municipal Link Officer ket pinunganayna nga inlawlawag ti programa ti 4 P’s kadagiti kameng agraman dagiti kabarbaro a miembro.

          Impeksa met ni Brgy. Captain Arnold “Bambi” V. Yangat iti LGU Cabugao iti  panakanayon dagiti kameng ti 4 P’s ket inkumitna ti panangtarabayna kadakuada a mangannurot kadagiti pagrebbengan nga aramiden dagiti kalugaranna nangruna iti panagmulmula ti nateng iti Barangay Bio-Intensive Garden ken iti Backyard Gardening a paset ti programa a mangnayon pay iti tulong a naited kadagiti 4 P’s recipients.

          Dinakamat ni Miss Aida Cueto a malaksid iti pannakaasikaso ti salun-at dagiti kameng, na-orientasionanda iti kallabes a bulan maipapapn iti Solid Waste Management, Clean and Green Program ken ti Edukasion a pakabuklan ti programa.

          Innayon ni Miss Cueto nga iti Barangay Pug-os ti maysa kadagiti   barangay a nagmitingandan  manipud nangrugi ni Mr. Gary Visera a tumulong ditoy Cabugao. Sinuktanna ni Ms. Annabel Rosario, dati a DSWD Municipal Link ti programa ti 4 P’s.

          Ti pannakaisaknap  ti 4 P’s ket paset ti prayoridad a programa ti Gobierno Munisipal nga idauluan ni Mayor Edgardo “Ediboy” S. Cobangbang, Jr. a mangbadang  kadagiti makasapul ti tulong nga umili tapno mayagpangda ti kasasaadda ket agbalinda met a produktibo a makipagili ti Cabugao. # (Web In-Action)   

 
 

No comments:

Post a Comment