Cabugao, Ilocos Sur (Nobiembre 11, 2011) – Dagiti trabahador idiay Riyadh, Saudi Arabia nga indauluan ni Maestro Armando S. Azcueta ket kalikagumanda nga ibaga nga isuda ti nakaigapuan ti pannakabangon ti Arko ti ili a Cabugao a naipatakder iti National Highway, Brgy. Sagayaden Norte, Cabugao, Ilocos Sur ken idi panawen a panagtakem ni Nag-Mayor Andrea Soller-Tan.
Ti Cabugao Association of Riyadh Expatriates (CARE) nga inorganisar ni Founding President Armando S. Azcueta ket buklen ti 12 a drivers ken skilled workers a nangsapul ti gasatda idiay daga ti Saudi Arabia idi tawen 1989. Umabot iti P110,000 ti naur-or a kontribusion dagiti opisiales ken miembros (12) ken tulong ti sumagmamano a gagayyemda a saan nga umili ti Cabugao ken dadduma pay a saanen nainaganan.
Imbatad ni Maestro Armando a sigud idi a Marker ti Arko ket napagnunumuanda nga agtartarabaho iti Riyadh a padakkelenda ken papintasenda daytoy. Idi nagbakasion ni Mr. Carlito Villegas ditoy Cabugao, kinasarita ni Nag-Mayor Andrea Soller-Tan ti immun-una ket imbagana a tumulong dagiti trabahador ti pagilian nga ayanda iti mabalinda met nga ipatakder a proyekto ditoy ilida. Ket apaman a simmangpet ni Apo Carlito iti Saudi Arabia, di nagtaktak a nangiyuman ken ni Maestro Armando ket napagnunumuanda iti asosasionda a mangipatakderda iti proyektoda nga isu ita ti Arko. Nalpas ti Arko idi 1995.
Dagiti kakadua ni Maestro Armando a nagur-or ti pundo a nausar ket dagiti sumaganad: Maestro Armando Azcueta, Mr. & Mrs. Simeon Baclig, Avelino Vite, Carlito Villegas, Crispin Somera, Flor Amor Arcalas, Renato Puzon, Noni Garde, Wilson Baclig, Ede Samuel Vallejo, ken Ronnie Dolores.
Iti sabali a bangir, adda met nainayon a pannakapasayaat ti Arko nga inaramid ti napalabas nga Administrasion, segun ken ni Maestro Armando S. Azcueta, agdama a Kagawad, Barangay Baclig, Cabugao, Ilocos Sur.# (Web Team)
No comments:
Post a Comment