Tuesday, November 29, 2011

DIRECT SEEDING, 5 EKTARIA A DEMO-FARM TI SITIO CALLAGUIP

Cabugao, Ilocos Sur (Nobiembre 29, 2011) -  Bunga ti nadur-as a panagsukisok ti  Ilocos Integrated Agricultural Research Consortium (ILIARC), DA-Ilocos Norte Provincial Center, Batac City,  agdiskubreda kadagiti klase ti pagay a maiyannatup kadagiti disso ti pagtatalonan nga adda iti kategoria ti saline (magam-odan ti apgad), submerge (kalubuan ken lungog), rainfed (agpannuray ti tudo), irrigated (adda pasayakna).

Babaen ti pannuporta ti Gobierno Munisipal babaen ti panangidaulo ni Mayor Edgardo “Ediboy” S. Cobangbang, Jr., nagkammayet ti ILIARC-INPC ken DA-LGU Cabugao a nangorganisar ti Techno-Demo Research ti lima nga ektaria iti Sitio Callaguip, Barangay Baclig, Cabugao, Ilocos Sur a buklen ti 10 a Farmer-Cooperators nga idauluan ni Edgardo Garcia ita a 2nd Cropping 2011-2012.

Idi Nobiembre 26, 2011, naaramid ti panagmulada babaen ti “direct seeding” wenno pannakaiwaris a natanang  ti napatubo a bukel ti pagay iti naisaganan a pagtatalonan nga apagsalapasap ti danumna. Tinarawidwidan  da Edwin Joseph Franco, Agriculturist ti ILIARC-INPC  ken Dionicia R.  Seatriz, Municipal Technologist, DA-LGU Cabugao ti pannakaiwaris dagiti bukel ti pagay.


Imbatad ni Franco a dumtengto ti panawen nga agsaltek ti maapit iti Hybrid (maximum plateau) ket maysa nga estratehiada ti pannakapatanor ti dadduma a klase ti pagay a mangbalanse ti panagbaba ti maapit. Kangrunaan a programa ti Gobierno Nasional ti panangpatasna ti kasapulan a pagtaraon  ti lumublobo  a populasion kasta met iti LGU’s, innayon ti Agrikultor. Daytoy ti gapuna a dida agsarday nga agsukisok ti mamulaan ta adu pay laeng ti nakatiwangwang a dagdaga/bangkag  iti  Rehion Uno  a masakupanda a mabalin a mamulaan (mapadanuman ken maiyiras) ti wagas a pannakamulana.
Panggep pay ti panagsukisok a maiwayat ti panagsanay dagiti mannalon tapno kalpasan daytoy a demo-farming ket nakasagananto metten dagiti sumaruno a mangimula kadagitoy a klase ti pagay kadagiti sabsabali a disso ti pagtatalonan. Bassit laeng ti pagdumaanda iti proseso iti pannakaipatungpal ti Techno-demo ti Hybrid daytoy a baro a takuat ti DA-ILIARC.

 

Manamnama a nangato ti bilang ti maapit no mataripato a nasayaat ti mula a pagay ken kasla inbred ti kaaduan a  sagudayna  ket agtultuloy met ti panangmonitor ti taga-DA-ILIARC-INPC ken DA-LGU Cabugao agingga a mapasingkedan nga agballigi ti Techno-Demo Research. # (Web Research)

No comments:

Post a Comment