UMAAYAMTAYO TI TAEKWONDO, BALITOK KEN SILVER TI INABAKDA!

Cabugao, Ilocos Sur (Nobiembre 28, 2011) – Uppat nga umaayam iti Taekwondo babaen ti Ilocos Sur Taekwondo Chapter ken taga-Cabugao, Ilocos Sur ti nangyalat ti dua a balitok, maysa a silver ken semi-finalist iti kalleppas a dangadang itoy nga ay-ayam a nabansagan ti BATANG PINOY 2011 a naangay sadiay FVR Gymnasium, Baguio City idi Nobiembre 24-27, 2011.

Dagiti sumaganad nga umaayam ken inyawidda a balligi:

 

Dseudenn Pyvan Pasia	Gold
Keybert Lee Lumbania	Gold
Jamela Mae Paligutan	Silver
Angelika Cammile Reintar	Semi-finalist

         

Malaksid iti Semi-finalist, dagiti tallo a kangrunaan a  Taekwondo Players ket maikasada manen para iti salisal ti NATIONAL BATANG PINOY a maaramid inton Disiembre 10-13, 2011 sadiay Naga City.

Iti ibibisita ti Taekwondo Team nga imbagian ni Coach Romel S. Singson iti opisina ni Mayor Edgardo  “Ediboy”  S. Cobangbang, Jr., inapresiar ti  Alkalde dagitoy a balligi ken pammadayaw a nagun-od dagitoy nga umaayam. Kalaksidan itoy, nanayonan pay ti panagtalekda iti bukodda a bagi ken kabaelan a makidangadang manen iti nangatngato a benneg ket mamati ti Mayor a mapagballigian dagiti umaayam daytoy a  sumaruno a pannakisalipda.

Nagyaman met  ti grupo ti Taekwondo Team iti pammigbig ken agtultuloy a  suporta ni Mayor Ediboy kadagiti naragpatda a balligi a nakaidayawanda ken iti ili ken probinsiada a naggapuanda.

“Gapu iti pannarabay  ken suporta ni Mayor Ediboy iti grupomi, isu pay ti inspirasionmi a manggaw-at ti balligi- uray manen ti papanmi idiay Naga City,” imbatad ni Coach Singson.

“Nagasat daytoy nga administrasion ta adda ti kas ken ni Sir Ediboy a patron ti sports a mangmangted ti importansia ti pagduyosan dagiti annakmi. Siguro inted ni Apo Dios a sagudayda daytoy  a Taekwondo ta iti baet ti kinababbai ti kinataoda, natibkerda met nga agduyos ti martial arts,” innayon met ti dua nga inna a taga-LGU nga adda annakda a sursurotenda no mapanda agsanay ken  makisalip.

Ti Taekwondo ket maysa a klase ti ay-ayam a mangtubay ti disiplina iti agtutubo, mangitandudo iti ehersisio a kasapulan ti salun-at, mangitag-ay ti kinasiasino ti agduyos babaen iti popularidad agsipud ta maibilang daytoy kadagiti nalatak nga ay-ayam a  mapagsasalipan ita iti tay-ak ti sports.

Daydi    Dios-ti-Aluadna a  Maestro Franklin Singson ti University of Northern Philippines (UNP) ti pioneer ti Taekwondo ditoy Ilocos Sur. Maysa a Karate Blackbelter ken mangisursuro idi  ti subject ti BS Criminology. Segun ken ni Romel a barona, nadiskubre ti amana  ti Taekwondo a napintas nga ay-ayam a maisaknap kadagiti agtutubo ken ubbing ta mayataday daytoy nga ay-ayam ti pannakapasayaat ti panagdakkelda no la ketdi aginteresadoda a sursuruen. #  (Insurat ni JOED S. SAJONIA)